अधर्माचो प्रतिकार जायच
भांगरभूंय | प्रतिनिधी
गुन्यांवकारी कारवायो करतात जाल्यार चाबूक बसपाकूच जाय. अर्धमाचो प्रतिकार करपाक…
भगवान श्रीकृष्णान अर्जुनाक झुजामळाचेर सांगिल्लें, ‘तस्मात्सर्वेषु कालेषु मां अनुस्मर युध्य च। मय्यर्पितमनोबुद्धिर्मामेवैष्यस्यसंशयः॥’ म्हणजे…. हे खातीर तूं दर खेपे म्हजें स्मरण कर आनी झूज करपाचें कर्तव्य पुराय कर. तुजें मन आनी बुद्द म्हाका ओंप म्हणल्यार तुजें कर्म म्हाका समर्पित कर… हातूंत कसलोच दुबाव ना की तूं म्हजे भितरुच येतलो, एकरुप जातलो. भगवद् गीतेंतलो हो श्लोक आमकां शिकयता, की आमी कर्तव्याक पाळो दिवंक जाय आनी ताचे वांगडाच देवाचें स्मरणूय करपाक जाय. म्हणल्यार देवाचें नांव घेवन पेंगट बांदून वावराक लागपाक जाय, यश आपशीच मेळटा, आयज ना जाल्यार फाल्यां!
रामजल्मभुमी तीर्थक्षेत्र न्यासाचे भांडारी स्वामी गोविंद देवगिरी महाराज हांणी सनातन राष्ट्र शंखनाद महोत्सवांत नेमकें हेंच सांगलें. ‘आमचो देश धर्मशाळा जाला. आतां अधर्माचो प्रतिकार करपाची तयारी समाजान करपाची गरज आसा.’ समाजान आतां उजू मार्गाचेर चलूंक जाय, जाल्यारुच आमचो देश महासत्ता जातलो. पुराय संवसारांत ताचो जयजयकार जावचो, देशाचेर वायट नदर दवरपाक दुस्मानांक पसून धाडस जावचें न्हय, अशेंच तांकां म्हणपाचें आसतलें. भारतीय समाजान मनार घेतलें जाल्यार हें सहज शक्य आसा. भगवान श्रीकृष्णान जसो अर्जुनाक जागृत केलो, मार्गदर्शन केलें, तशेंच प्रत्येक संतान, समाज सेवकान, शिक्षकान, वेवसायिकान करपाक जाय. ही तांची लागणूक.
आमचो देश आमकां आवय सारको. आवयक आमी रेश्पेद दितात. तिचें आयकतात, मानान वागयतात, तिचे कडेन फटींगपणा, धोंगीपणा करीनात, तिची दिशाभूल करीनात. म्हणटकच आमी भारतमाते कडेन कशें वागपाचें?…. आमकां जल्म दिवपी आवय कडेन वागतात तशेंच!! एक नागरीक म्हूण देशाचे उदरगतीक योगदान दिवप हें आमचें कर्तव्य. ते खातीर कितें करचें? संविधानान नागरिकांची कर्तव्यां सांगल्यांत, तीं पाळचीं. देश मुखार वतलो. संत तुकाराम, ज्ञानेश्वर, बसवेश्वर, कबीर, गाडगेबाबा, छत्रपती शिवाजी महाराज, संभाजी महाराज, झांशीची राणी, अहिल्याबाई होळकर, महात्मा ज्योतिबा फुले, महर्षी कर्वे, स्वामी विवेकानंद… कितलींशीच व्यक्तीमत्वां, तांचे आदर्श घेवचे. आमचे विचारसरणींत बसनात अश्या व्यक्तींच्या कार्याचो आपरोस काडून तातूंतलें बरें तें अंतस्कर्णांत रिगोवचें. मरतकच ‘भांगर मनीस तो’ अशें दरेकल्यान म्हणपाक जाय, इतलें तरी कर्तृत्ववान जावंया.
देवगिरी महाराजान सांगलां तें खरें. आमचो देश म्हणल्यार धर्मशाळा जाल्या. कोणूय उठ्ठा आनी सरळ भितर घुसता. आतंकवाद्यांनी काश्मीरांत कितें केलां, तें सांगपाची गरज ना. सोंपून सोंपनात ते आनी थंयचीं मरणा, विध्वंस. विदेशांतले स्थलांतरीत घुसत आसात. ‘हे विश्वची माझे घर’ ही म्हान संकल्पना. पूण ती घुसखोरीच्या बाबतींत नाका. सुरक्षा वेवस्था कडक करुंया. स्थलांतरितांक लागून साधन सुविधा, रोजगाराचेरुय चेंपण येता. तातूंत रावतात त्या देशांत ते गुन्यांवकारी कारवायो करतात जाल्यार चाबूक बसपाकूच जाय. अर्धमाचो प्रतिकार करपाक समाजान सदांच तयार रावूंक जाय. मात, न्यायालय, पुलीस, जवान आसतना आमकां नैतिक पुलीस जावंक मेळना. ते खातीर आमी समाजांतलो भ्रश्टाचार, जातीयवाद, शोशण, अत्याचार, देशद्रोही कृत्यां आड जागृत रावंक जाय. पुराव्या सयत ह्या काळ्या कर्मां आड आवाज काडपाक जाय. जाय जाल्यार ते खातीर आमच्यान शिकून स्वता प्रामाणीक कर्तव्यदक्ष पुलीस, वकील जावं येता, लश्करांत वचूं येता, निसुवार्थी समाजसेवा करूं येता, शिक्षण- भलायकी मळाचेर सेवाकार्य करूं येता.
दळडीर रेशे सकयल्या भुरग्यांक शिकोवं येता, चलयां मदीं शिक्षणीक जागृताय करूं येता, कुशळटाय, डिजीटल साक्षरताय वाडोवं येता, येरादारी नेम पाळूं येतात, सरकारी सेवा वेळाच्या बंधनांत दिवं येतात, दुयेंतीं खातीर आमी भलायकी शिबिरां घेवं शकतात. सगले कर प्रामाणीकपणान भरुंक शकतात. नितळसाण राखून स्वच्छ भारत मोहीम यशस्वी करुं येता. सरकारी, समाजीक कामां भ्रश्टाचारा विणें जातलीं, हाची जतनाय घेवं येता. धर्म, भाशा, संस्कृताये मदले विवीधतायेचो आदर करूं येता, सोशल मिडिया वयलीं फटिंगपणा, दुस्वास, भेदभाव काबार करूं येता, सैमीक संकश्टां वेळार उजो पालोवपी दळाक मजत करूं येता. सैम काबार करून न्हंयो, दोंगर, शेतां, भाटां विकपाचे प्रकार चल्ल्यात, ताचे आड झगडूं येता. सोरो, ड्रग्सांच्यो न्हंयो व्हांवतात, त्योय आमीच आटोवंक जाय.. समाजान करपा सारकें खूब कितें आसा.
दरेकल्यान आपूण कश्ट करून खातलों, गैरप्रकार, भ्रश्टाचार, अन्याय, दुस्वास करचो ना, प्रामाणीकपणान काम करतलों इतलेंच थारायत जाल्यार पसून समाजांतलो अधर्म उणो जातलो. कांय जाण तोंडान देव देव करतात आनी हातान वायट कृत्य करतात, हे चुकीचें न्हय? संत कबीरान बरयलां, मोको कहाँ ढूंढें बन्दे, मैं तो तेरे पास में। देव म्हणटा, ‘भक्ता म्हाका रे खंय सोदता? हांव तुजेच कुशीक आसा मरे, तुज्या स्वासांत, विस्वासांत हांव भरून उरलां.’ भगवद् गीता सांगता, घे देवाचें नांव आनी कर सुरू काम. आमचो भारत महासत्ता करपाक आमी सगले भारतीय हातांत हात घालून एकवटान वावुरुया. समाजांतल्या अधर्माचो नाश करूंया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
