भांगरभूंय | प्रतिनिधी
पणजी: पर्वरीच्या मॅजेस्टीक हॉटेला लागसारा आयतारा सकाळीं जाल्ल्या भिरांकूळ अपघातांत फराझ नायक (१९, सुकुर- पर्वरी) हाका मरण आयलें. ही ही घडणूक स्वयं अपघात काय कोणें धपको दिला, हाचो तपास पुलीस सध्या करतात.
आयज सकाळीं सुमार साडेचार वरांचेर फराझ नायक दुचाकी वेल्यान वतना हो अपघात जालो. हातूंत ताका गंभीर दुखापत जाली आनी मरण आयलें. अपघाता उपरांत थळाव्यांनी पुलिसांक म्हायती दिली. पुलिसांक अपघातांचे सुवातेर इंटरनेट केबल पडिल्ले दिसले, हे केबल अपघाताक कारण थारिल्ल्याची शक्यताय पुलिसांनी उक्तायल्या. सध्या पुलीस अपघाताचें नेमकें कारण सोदपाचो यत्न करतात. फराझचो पोस्टमार्टमाचो रिपोर्ट हातांत आयले उपरांत नेमकें कारण स्पश्ट जातलें अशें तांणी सांगलें.
एप्रील म्हयन्यांत उत्तर गोंयां परस दक्षीण गोंयांत अपघातांचो चड आंकडो नोंद जाला. उत्तर गोंयांत ८३ अपघात जाले, जाल्यार दक्षीण गोंयांत ११५ अपघातांची नोंद जाल्या. अपघातांचो आंकडो चड आशिल्ल्यान दक्षीण गोंयांत १४, जाल्यार उत्तर गोंयांत १२ जाणांक मरण आयलें. उत्तर गोंयांत आठ जण गंभीर जखमी जाले, जाल्यार १८ जाणांक किरकोळ दुखापत जाली. हाचे भायर, दक्षीण गोंयांत ९ जाण गंभीर जखमी जाले, जाल्यार ५८ जाणांक किरकोळ दुखापत जाली. लोकांनी गरज आसा जाल्यारुच गाडयो भायर काडच्यो, तशेंच येरादारीची सगले नेम पाळून त्यो चलोवच्यो, असो उलो मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
