भांगरभूंय | प्रतिनिधी
जेरुसलेम, खबरां संस्था: इझ्रायलान गाझांत फाटल्या २४ वरांनी केल्ल्या हल्ल्यांत १४६ पॅलेस्टिनी नागरिकांक मरण आयलें. जाल्यार ४५९ जाण जखमी जाल्ल्याची म्हायती हांगच्या भलायकी अधिकार्यांनी दिली. मार्चांत झूज बंदी मोडले उपरांत बिरेस्तार सावन इझ्रायलान गाझाचेर हवाई हल्ले आनीक खर केल्यात.
मजगतीं, गाझांत काल रातच्या ५८ जाणांच्यो कुडी सांपडल्यात. जायते जाण मातयेचे रांशी पोंदाक आकडून उरल्यात, अशी म्हायती उत्तर गाझाच्या इंडोनेशियन हॉस्पिटलाचे संचालक मारवान अल सुलतान हांणी दिली. फाटल्या १९ म्हयन्यांच्या झुजां मजगतीं इझ्रायल सैन्यान केल्ल्या हल्ल्यांत हॉस्पिटलाचेंच लुकसाण जालां. मार्चांत नाके बंदी उपरांत वैजकी सामान उध्वस्त जाल्ल्याचें म्हणिल्लें.
मजगतीं, हमासाक हारोवप आनी ओलिसांची सुटका करप ह्याच हेतान ‘ऑपरेश गिडॉन वॅगन्स’ सुरू केल्ल्याचें इझ्रायन सांगलें. इझ्रायली लश्करान शुक्रारा, उत्तरेच्या बेत लाहिया शार आनी जबालिया निर्वासीत छावणीचेर केल्ल्या हल्ल्या उपरांत गाझाच्या नागरिकांक दक्षीणेकडेन वचपाचे आदेश दिले. तशेंच नागरिकांनी खान युनूस शारा कडेन वचपाचो मार्ग धरिल्ल्याचें सुत्रांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
