भांगरभूंय | प्रतिनिधी
आयएएस संजीत रॉड्रिग्स हांकां गृह मंत्रालयाची शिटकावणी
भांगरभूंय । प्रतिनिधी
पणजी : गोंयकार आयएएस अधिकारी संजीत रॉड्रिग्स हांकां गोंयाचे सेवेंतल्यान मुक्त करून तत्काळ लडाखच्या प्रशासनांत रुजू जावपाचे आदेश गृहमंत्रालयान जारी केल्यात. तशें केलें ना जाल्यार रॉड्रिग्स हांचेर शिस्तभंगाचे कारवाये सयत तांकां बडटे पासून आडायतले, अशी खर शिटकावणी दिल्या.
2013 च्या अॅग्मू केडराचे आयएएस अधिकारी आशिल्ले संजीत रॉड्रिग्स हांची गृह मंत्रालयान 12 नोव्हेंबर 2024 ह्या दिसा सावन गोंयांतल्यान लडाखांत बदली केल्ली. पूण रॉड्रिग्स हांकां गोंय सरकारान अजून गोंयांतले सेवेंतल्यान मुक्त करूंक ना. अॅग्मू कॅडर 2016 च्या आयएएस/ आयपीएस बदल्यो आनी पोस्टिंगा संबंदांतल्या मार्गदर्शक तत्वां प्रमाण, गृह मंत्रालयान बदल्यो केल्ल्या आयएएस/ आयपीएस अधिकाऱ्यांनी बदलेचो आदेश जारी जाल्ले तारखे सावन 15 दिसां भितर संबंदीत सुवाते वयले सेवेंत रुजू जावप गरजेचें आसा. संबंदीत अधिकाऱ्यान हीं मार्गदर्शक तत्वां पाळ्ळी ना जाल्यार तांचो पगार आडावप, बडटी आडावप अश्यो कारवायो जावपाक शकता. ताका लागून संजीत रॉड्रिग्स हांणी तत्काल गोंयाचे सेवेंतल्यान मुक्त जावन लडाखाचे सेवेंत रुजू जावचें. ना जाल्यार तांचेर शिस्तभंगा सयत हेर कारवायो करतले, अशें गृह मंत्रालयान जारी केल्ल्या आदेशांत म्हणलां.
गृह मंत्रालयान ह्या आदेशाची प्रत गोंयच्या मुख्य सचिवाक धाडून तांकां संजीत रॉड्रिग्स हांचो पगार दिवचो न्हय, अशी विनवणी केल्या. जाल्यार लडाखाच्या मुख्य सचिवाक आदेशाची प्रत धाडून, संजीत रॉड्रिग्स लडाखाचे सेवेंत रुजू जाल्ल्याचो अहवाल सादर करपाची विनवणी केल्या.
दोन दिसां आदीं जम्मू काश्मीरांतल्यान गोंयांत बदली जाल्ले यतींद्र मराळकार आनी संजीव गडकार ह्या आयएएस अधिकाऱ्यां वांगडाच संजीत रॉड्रिग्स हांकां 9 मार्च 2021 ह्या दिसा आयएएस पदार बडटी मेळिल्ली. रॉड्रिग्स हे गोंय लोकसेवा आयोगा वरवीं 9 जानेवारी 1998 ह्या दिसा कनिश्ठ श्रेणी अधिकारी म्हूण गोंय सेवेंत रुजू जाल्ले. ते उपरांत वेळावेळार बडटी मेळ्ळे उपरांत तांकां आयएएस पदार बडटी दिल्ली. बडटे उपरांत सुरवेक तांची मिझोरम आनी ते उपरांत अरुणाचल प्रदेशांत बदली केल्ली. ते उपरांत परतून तांची बदली गोंयांत जाल्ली. पूण 12 नोव्हेंबर 2024 ह्या दिसा तांची बदली परतून गोंयांतल्यान लडाखांत केल्ली.
मजगतीं, राज्य नागरी सेवेंतल्या बडट्यां उपरांत आयएएस पदार नेमणूक जाल्ले कांय अधिकारी लेगीत बदले उपरांत निर्धारीत वेळांत बदलीचे सुवातेर रुजू जायनात. गोंयांतले सेवेंतूच रावप ते पसंत करतात, अशें खूब खेपे दिसलां.
स्मार्ट सिटीच्या कामांक लागून आरोप
पणजी स्मार्ट सिटी प्रकल्पा खातीर सरकारान संजीत रॉड्रिग्स हांची इमॅजीन पणजी स्मार्ट सिटी विकास लिमिटेडच्या (आयपीएससीडीएल) सीईओ पदार नेमणूक केल्ली. पूण स्मार्ट सिटींतलो पचपचीत कारभार आडावपाक तांकां मातूय येस येवंक नाशिल्ल्यान पणजेकारां सयत स्वता मंत्री तशेंच पणजीचे आमदार बाबूश मोन्सेरात हांणीय तांचेर आरोप केल्ले. स्मार्ट सिटींतल्या बाबत कामांक रॉड्रिग्सीसूच जापसालदार आसात, असो आरोप तांचेर अजून जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
