भांगरभूंय | प्रतिनिधी
पणजी : हवामान खात्यान गोंयांत 18 ते 23 मे मेरेन वादळी वाऱ्या सयत मध्यम स्वरुपाच्या पावसाची शक्यताय उक्तायल्या. ते प्रमाण ह्या स दिसां खातीर पावसाचो यलो अलर्ट जारी केला. गोंयांत 24 वरांत सरासरी 10.3 मिलिमिटर पावसाची नोंद जाल्या. ह्या काळांत दाबोळी 27.8 मिमि, म्हापश्यां 25 मिमि जाल्यार मुरगांवां 21.4 मिमि पावसाची नोंद जाली. शेनवारा गोंयांतल्या कांय वाठारांनी पावस पडलो.
शेनवारा पणजे चडांत चड 33.5 जाल्यार उण्यांत उणो 26.9 अंश सेल्सियस तापमानाची नोंद जाली. मुरगांवां चडांत चड तापमान 34.8 अंश जाल्यार उण्यांत उणें 26.4 अंश सेल्सियस तापमान आसलें. फुडले स दीस गोंयांतलें चडांत चड तापमान 34 ते 35 अंश जाल्यार उण्यांत उणें तापमान 26 अंश आसपाची शक्यताय आसा. गोंयांत 1 मार्च ते 17 मे मेरेन सरासरी 35 मिमि पावसाची नोंद जाल्या. अंदूं पावसाचें प्रमाण 59.5 टक्क्यांनी चड आसा. 18 ते 21 मे ह्या काळांत वाऱ्याचो वेग वराक 45 ते 55 किलोमिटर मेरेन पावपाची शक्यताय आशिल्ल्यान नुस्तेमारांनी दर्यांत वच्चें न्हय, असो खात्यान उलो मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
