भांगरभूंय | प्रतिनिधी
आयएएस यतींद्र मराळकार, संजीव गडकार गोंयांत
भांगरभूंय । प्रतिनिधी
पणजी : शिरगांवचे श्री लयराई देवीचे जात्रेंत जाल्ले खेटाखेटीक जापसालदार धरून आयएएस अधिकारी स्नेहा गीते हांचे सयत उत्तर गोंय जिल्होधिकारी म्हूण हालींच नेमणूक जाल्ली यशस्वीनी बी. आनी अश्वीन चंद्रू ह्या आयएएस अधिकाऱ्यांची अरुणाचल प्रदेशांत बदली केल्या. जाल्यार नागरी सेवेंतले बडटे उपरांत आयएएस पदार नेमणूक जाल्ले यतींद्र मराळकार आनी संजीव गडकार ह्या दोन अधिकाऱ्यांची गोंयांत बदली जाल्या. केंद्रीय गृहमंत्रालयाचे अवर सचीव राकेशकुमार सिंग हांणी हे संबंदांतलो आदेश जारी केला.
स्नेहा गीते, यशस्वीनी बी. आनी अश्वीन चंद्रू हांच्या बदल्या उपरांत यतींद्र मराळकार आनी संजीव गडकार हांचे वांगडा जम्मू-काश्मीरांत सेवा दिवपी आयएएस अधिकारी शकील उल रेहमान राथर, लडाखांत सेवा दिवपी संतोष सुखदेव आनी लक्षद्वीपांत सेवा दिवपी अर्जून मोहन ह्या आयएएस अधिकाऱ्यांची गोंयांत बदली केल्या. तेचवरी गोंयांत सेवा दिवपी रमेश वर्मा, अरुण कुमार मिश्रा आनी सुनील आंचिपाका ह्या तीन आयएएस अधिकाऱ्यांची दिल्लीक बदली केल्या.
ओमवीर सिंग बिश्नोई गोंयांतल्यान दिल्ली
गोंयांत अतिरिक्त पुलीस म्हासंचालक पदाचेर आशिल्ले आयपीएस अधिकारी ओनवीर सिंग बिश्नोई हांचीय केंद्र सरकारान गोंयांतल्यान दिल्ली बदली केल्या, जाल्यार केशव राम चौरासिया हांची दिल्ली सावन गोंयांत बदली केल्या.
मराळकार, गडकार गोंयांत, गोंयकाराक खोस
गोंयच्या सर्वांगी उदरगती खातीर गोंयांत गोंयकारूच आयएएस अधिकारी जाय, अशी इत्सा विरोधी पक्ष खूब खेपे उक्तायताले. हे फाटभुंयेर यतींद्र मराळकार आनी संजीव गडकार हे दोन अधिकाऱ्यांची गोंयांत बदली जाल्ल्यान खूबश्या गोंयकारांनी खोस उक्तायल्या. नागरी सेवेंतल्या बडटी उपरांत आयएएस जाल्ले यतींद्र मराळकार हांची लडाखांत, जाल्यार संजीव गडकार हांची जम्मू-कास्मीरांत बदली जाल्ली. हे दोनूय अधिकारी आतां परतून गोंयांत येतात, तांच्या अणभवाचो गोंयाक निश्चीत फायदो जातलो, असो विस्वास खूब जाण उक्तायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
