भांगरभूंय | प्रतिनिधी
पणजी : गोंयचे भारतीय प्रशासकीय सेवेचे (आयएएस) ऍग्मू केडरचे संजीव गडकार आनी यतींद्र मराळकार ह्या दोन अधिकार्यांची अनुक्रमान जम्मू-काश्मीर आनी लडाखच्यान परत गोंयांत बदली केल्या. आयएएस यशस्वीनी बी, अश्विन चंद्रू आनी स्नेहा गिते हांची गोंयच्यान अरुणाचल प्रदेशांत, जाल्यार रमेश वर्मा, अरुण कुमार मिश्रा, सुनील अंचिपका हांची दिल्लीक बदली केल्या. तशेंच आयपीएस अधिकारी ओमवीर सिंग बिश्नोई हांची दिल्लीक बदली केल्या. वयल्या बदल्यांचो आदेश केंद्रीय गृहमंत्रालयाचे अवर सचिव राकेशकुमार सिंग हांणी जारी केला.
आयपीएस अधिकारी आशिल्ले ओमवीर सिंग बिश्नोई हे गोंयांत अतिरिक्त पुलीस महासंचालक पदाचेर कार्यरत आशिल्ले. तांच्या जाग्यार आयपीएस केशव राम चौरासीया (२००३) हांची दिल्लीच्यान गोंयांत बदली जाली. आयएएस यशस्वीनी बी (२०२०) ह्या उत्तर गोंयच्या जिल्लोधिकारी पदाचेर सेवा करता. जाल्यार स्नेहा गिते (२०१९) ह्यो विज्ञान-तंत्रज्ञान आनी कोयर वेवस्थापन खात्याच्या संचालकपदार सेवा करताल्यो. आयएएस अधिकारी अश्विन चंद्रू (२०१९) हे मुख्यमंत्र्यांचे ओएसडी म्हणून कार्यरत आशिल्ले. संतोष जी. सुखादेवे (२०१७) हांची लडाखच्यान, जाल्यार अर्जुन मोहन (२०१९) हांची लक्षद्वीपच्यान गोंयांत बदली जाल्या. हाचे प्रमाण शकिल उल रादर (२०१३) हांची जम्मू काश्मीरच्यान गोंयांत बदली जाल्या.
गोंयच्या वट्ट स आयएएस अधिकारी आनी एका आयपीएस अधिकार्यांची हेर सुवातेचेर बदली जाल्या. जाल्यार हेर सुवातेवेल्यान गोंयांत पांच आयएएस अधिकारी आनी एका आयपीएस अधिकार्यांची बदली जाल्या.
गोंयच्या आनी सध्या एग्मू कॅडरचे आयएएस अधिकारी आशिल्लेे संजीव गडकार आनी यतींद्र मराळकार हे दोगूय गोंय लोकसेवा आयोगा वरवीं ९ जानेवारी १९९८ दिसा कनिश्ठ श्रेणी अधिकारी म्हणून राज्य सेवेंत रुजू जाल्ले. तांकां बढती मेळ्ळे उपरांत २०२० वर्सा आयएएसपदार बढती दिली. २६ जुलय २०२२ दिसा जारी केल्ल्या आदेशांत संजीव गडकार (२०१३) हांची जम्मू-काश्मीर जाल्यार, यतींद्र मराळकार (२०१३) हांची लडाखांत बदली केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
