भांगरभूंय | प्रतिनिधी
गोंय कर्मचारी भरती आयोगाचो निर्णय
पणजी : कर्मचारी भरती आयोगा वरवीं नव्यान भरती जावपी पुलीस उपनिरीक्षक (पीएसआय) पदां खातीर सध्या सेवेंत आशिल्ले पुलीस शिपाय (पीसी), हवालदार (एचसी) आनी साहाय्यक पुलीस उपनिरीक्षक (एएसआय) हांचे खातीर पिरायेची अट मेकळी करून ऑनलायन अर्जाच्या नमुन्यांत गरजेच्यो सुदारणा केल्यात. पीएसआय पदां खातीर इत्सुकांनी सेवा उण्यात उणी ३ वर्सांची आसप गरजेचें. गोंय कर्मचारी भरती आयोगान हे विशींची नोटीस जारी केल्या.
कर्मचारी भरती आयोगान हेर जायत्या पदां सयत पुलीस उपनिरीक्षकांची (पीएसआय) १८७ पदां भरपा खातीर जायरात दिल्या. १८७ पदां मदलीं ३० पदां बायलां खातीर आसात. हाचे भायर एससी, एसटी, ओबीसी, खेळगडे ह्या गटां खातीर राखीव जागे आसात.
सेवेंतले पुलीस शिपाय, हवालदार आनी साहाय्यक पुलीस उपनिरीक्षक हांकां अर्ज करप शक्य जावचें म्हणून ऑनलायन अजार्र्ंत गरजेचे बदल केल्यात. सेवेंतल्या पुलिसां खातीर पिरायेचे मर्यादेंत सूट मेळटली. अर्थीक नदरेन मागास (इडब्लूएस), हेर मागासवर्गीय (ओबीसी) आनी उक्त्या (यूआर) गटा खातीर ४० वर्सां पिराय आशिल्ले अर्ज करपाक पात्र आसात. एससी/ एसटी गटांत ४५ मेरेन पिराय आशिल्ले अर्ज करपाक पात्र थारतात अशें आयोगान स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
