१० सरकारी खात्यांच्या ११० कण्णम गाडयांचे पावणेक सुरवात

भांगरभूंय | प्रतिनिधी

पणजीः गोंय कोयर वेवस्थापन महामंडळांत कदंबाचे कण्णम बसीं सयत हेर खात्याच्या पोरण्यां गाडयांचो विलो लावपाक पावणेक सुरवात जाल्या. पर्वरे कदंब महामंडळाचे डेपोंत ही पावणी चलता. सगळ्यांत चड बोली लावपी मनशाक हीं वाहनां मेळटलीं.
महामंडळान कदंब येरादारी महामंडळ,विज्ञान आनी तंत्रगिन्यान खातें, नियोजन आनी सांख्यिकी खातें, वीज खातें, शिक्षण खातें, गोंय शिक्षण उदरगत महामंडळ, गोंय विधानसभा, सामान्य प्रशासन खातें आनी पुलीस महानिरिक्षकांची कचेरी हांच्या ११० गाडयांचो विलो लावपा खातीर ही पावणी सुरू केल्या.
हातूंत १५ वर्सां वयल्या आनी १५ वर्सां सकयल्या वाहनांचो आसपाव आसा. जीं १५ वर्सां आदलीं वाहनां आसात तीं फकत नोंदणीकृत वाहन स्क्रॅपींग सुविधा (आरव्हीएसएफ) आशिल्ल्या कंत्राटदाराक पावणी लावन विकतीं घेवपाक मेळटलीं, जाल्यार १५ वर्सां सकयलीं वाहनां सामान्य लोकांक घेवपाक मेळटलीं.

ह्या सगळ्या ११० कण्णम वाहनांचें उण्यांत उणें मेळून वट्ट ५८.९५ लाख इतलो दर आसा. पावणेंत बोलिदारांक ह्या दरा परस चड बोली लावन हीं वाहनां व्हरपाक मेळटलीं. ११० मदलीं ७७ वाहना १५ वर्सां जाल्यार ३३ वाहनां १५ वर्सां सकयलीं आसात.
जीं वाहनां पावणे खातीर दवरल्यांत ताचेर लोट क्र. बरयला. कुशीक आशिल्ल्या वाहनांचे वळेरेर वाहनांची उण्यात उणी किंमत पळोवची आनी लोटा नं. कुशीक बरयल्ल्या दरा परस चडांत चड बोली कागदार बरोवन ती पावणी पेटूलांत. दनपरां ३.३० पावणी पेटूल उक्तें जावन ज्या मनशान चडांत चड बोली लायल्या तांकां हीं वाहनां मेळटलीं.
१५ वर्सां सकयलीं वाहनां जीं सामान्य मनशाक विकतीं घेवपाक मेळटात तांची पावणेची उण्यात उणें दर सामकी परवडपा सारकी आसा. हातूंत टोयोटा इनोव्हा गाडयेचो आस्पाव आसा आनी तांचें उण्यात उणें दर ३० ते ५० हजार मेरेन आसा, टाटा सुमो आनी महिंद्रा स्कोर्पीयोचें उण्यांत उणें दर सुमार ५४ हजार मेरेन आसा, जाल्यार ६ बुलेट पेट्रोल हे दुचाकीचें उण्यात उणें दर ४,८०० मेरेन आसा, बजाज पल्सरची उण्यांत उणें सुमार ४००० जाल्यार स्प्लँंडराची ३,६०० आसा. जो मनीस हे किमती परस सगळ्यांत चड बोली लायतलो ताका हीं वाहनां घरा व्हरपाक मेळटलीं.