भांगरभूंय | प्रतिनिधी
न्यूयॉर्क, खबरां संस्था ः कॉर्नेल विद्यापिठाच्या शास्त्रज्ञांनी मशरूमाच्या मुळा सारक्या धाग्यांपसून (मायसेलियम) दोन खाशेले रोबोट तयार केल्यात. तो सादारण वीज वा बॅटरीचेर न्हय तर जिव्या मशरूम वरवीं नियंत्रीत करतात. एक रोबोट चाकां वयल्यान भोंवता, जाल्यार दुसरो पांच पांयांचो मोव रोबोट आसून तो ल्हवू ल्हवू हालचाल करता.
शास्त्रज्ञांनी मशरूम मायसेलियम रोबोटाच्या हार्डवेअराक जोडला. मायसेलियम इलेक्ट्रोड वरवीं वाचपी ल्हान- ल्हान विद्युत् सिग्नल तयार करतात. हे सिग्नल रोबोटाच्या हालचालींच्या भागांचेर नियंत्रण दवरतात. रोबोटांक अल्ट्राव्हायोलेट प्रकाश दाखयलो तेन्ना तांणी आपली दिका आनी हालचाल बदलली. मायसेलियमांतल्यान येवपी संकेत सामके हलके आशिल्ल्यान ते वाचपाखातीर एक खाशेलें विद्युत् इंटरफेस तयार केल्लें, जें ह्या सिग्नलांक डिजिटल डेटांत रुपांतर करता अशें शास्त्रज्ञ आनंद मिश्रा हांणी सांगलें.
ह्या रोबोटाचो सोद घेवपी रॉबर्ट शेफर्ड हाणें हो रोबोट कसलेच तार नासतना काम करतात अशें सांगलां. फुडाराक मातयेची चांचणी करून पिकांखातीर फावो त्या प्रमाणांत सारें थारावंक शकता. हाका लागून पर्यावरणाचें लुकसाणूय उणें जातलें.
वेस्ट इंग्लंड विद्यापिठाचो प्राध्यापक अँड्रयू अॅडमॅट्झकी म्हणटा, बुरशी पसून तयार केल्ल्या उपकरणांक लागून वायु प्रदुशणा सारक्या पर्यावरणांतल्या बदलांचेर नदर दवरूं येता. पूण अशे रोबोट व्हड प्रमाणांत रानांत वा दर्यांत सोडल्यार पर्यावरणाकूय हानी करपाक शकतात अशी शिटकावणी साउथम्प्टन विद्यापीठाचे राफेल मेस्त्रे हांणी दिली. सद्या हे रोबोट प्रयोगशाळांनीच मर्यादीत आसात, पूण फुडाराक शेतकी, पर्यावरण निरिक्षण, आपत्ती निवारण ह्या मळार तांचो उपेग करूं येता. कार्नेगी मेलॉन विद्यापिठाची प्राध्यापिका व्हिक्टोरिया वेबस्टर-वुड हिणें सांगलें, हो अभ्यास खाशेलो आसा कारण बुरशीचो वापर पयलेच खेपे जाला. बुरशी जिवीं दवरप सोंपें आसता, जाका लागून हो रोबोट शेतकी आनी दर्यांतल्या निरिक्षणाक चड योग्य थारतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
