भांगरभूंय | प्रतिनिधी
इफ्फी खातीर जातलें केंद्र तयार: राजेंद्र तालक
मडगांव : मडगांवच्या रवींद्र भवनाक इफ्फीचें केंद्र करपा खातीर आतां नवी स्क्रीन, प्रोजेक्टर बसोवप आनी हेर अपग्रेडेशना संबंदी कामां करतले. हाका लागून मुखेल सभाघर जुलय आनी ऑगस्ट म्हयन्यांत बंद उरतलें. अध्यक्ष राजेंद्र तालक हांणी तियात्रिस्त आनी कलाकारांक विस्वासांत घेवन काम करता अशें स्पश्ट करतना रवींद्र भवन इफ्फीचें केंद्र जातलें, अशें सांगलें.
मडगांव रवींद्र भवनांतल्या सभाघरांचीं जीं कामां फाटल्या कितल्याशाच वर्सां सावन आडकून उरिल्लीं ताचे कडेन लक्ष दितात. रवींद्र भवनांतल्या कार्यावळींक आडमेळीं निर्माण करिनासतना तें सांबाळपाचें काम करता. मुखेल सभाघराच्या पाख्याचें कामूय सध्या हातांत घेतलां. हाका लागून उदकाची गळती पुरायेन बंद जातली. रवींद्र भवनाच्या इमारतीक जोडिल्ल्या एनएक्स इमारतीचें काम परत सुरू जालां. डिझाईन आनी हेर कामां उदरगतीच्या मार्गार आशिल्ल्यान फुडल्या स म्हयन्यांनी तीं कार्यान्वीत जातलीं. ब्लॅक बॉक्सांतलीं कामांय हातांत घेतल्यांत. हाका लागन ह्या मान्सूनांत रवींद्र भवनांत गळतीचो प्रस्न निर्माण जावचो ना.
रवींद्र भवनाच्या मुखेल सभागृहांतलें नुतनीकरणाचें काम जातलें. ह्यान पयलीं मुखेल सभाघरांत फिल्म स्क्रिनींग जातालें. मात काळांतरान नवें तंत्रज्ञान आयिल्ल्यान तीं यंत्रणां पोरणीं जाल्यांत. स्क्रीन, सावंड टॅक्नोलॉजी नवी बसोवपाचीं कामां हातांत घेतले. हीं कामां १५ जून सावन सुरवात करतले. मात तियात्रिस्तांच्या मागणे प्रमाण १ जुलय सावन ऑगस्ट म्हयन्याचे निमाणें मेरेन नुतनीकरणाचीं कामां करतले. हाका लागून मुखेल सभाघर बंद दवरतले. कामां चालू आसतनाच सभाघर वापरपाक मेळ्ळ्यार, तियात्रिस्तांची वळेरी तयार केल्ल्यान ते प्रमाण संद दितले. सुमार २६ तियात्रिस्तांनी नांवनोंदणी केल्या. तियात्रिस्तांची बसका घेवन नुतनीकरणाच्या कामांचे नियोजन केलां. हाका लागून कोणेंच नुतनीकरणाच्या वा अपग्रेडेशनच्या कामांक विरोध करूंक ना. नुतनीकरणांच्या कामा उपरांत मडगांव रवींद्र भवन हें आंतरराष्ट्रीय चित्रपट महोत्सवाचें स्थळ जातलें, अशेंय तालक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
