भांगरभूंय | प्रतिनिधी
जांबावले तरणाटेचेर सुरी हल्लो प्रकरण
केपें: शिरवय-केप्यां सोमारा बोरयेचे तरणाटेचेर सुरी हल्लो करून गंभीर जखमी अवस्थेंत तिका मडगांव जिल्हो हॉस्पिटलांत उपचारा खातीर दाखल करून थंय सावन पळ काडिल्लो दुबावीत आरोपी अनंत कदम (आकें, मडगांव) हाचो केपें पुलीस सोद घेतात.
मेळिल्ले म्हायती प्रमाण अनंत कदम सोमारा दनपारां जांबावले श्रीदामोदर देवस्थानांत आयिल्लो. योगायोगान बोरयेची तरणाटी आपले इश्टिणीं सयत जांबावले देवाच्या दर्शनाक आयिल्ली. ही तरणाटी दर्शन घेवन परतून आपल्या घरा दुचाकी वेल्यान वता आसतना अनंत कदम हाणें तिचो पाठलाग करून तिका शिरवय आवडावपाचो यत्न केलो.
ह्या वेळार ताणें ते तरणाटेक दुचाकी वेल्यान सकयल उडयली आनी तिच्या नाकाचेर मूठ मारली तशेंच पोटार फोंपारी मारून आपले चारचाकी मोटारींत बसपाचो आग्रो केलो. ह्या वेळार तिणें न्हयकार दिल्ल्यान तिडकी भितर बोल्सांतली सुरी काडून तिच्या पोटार वार केल्ल्यान ती गंभीर जखमी जाली. उपरांत ताणें ते तरणाटेक आपले मोटारींत बसोवन उपचारा खातीर मडगांवच्या जिल्हो हॉस्पिटलांत दाखल करून थंय सावन पळ काडलो.
ह्या प्रकरणांत आंजेल ट्रावासो (पंचवाडी, फोंडें) हांणी केपें पुलिशेंत कागाळ दाखल केल्या.
केपें पुलिसांनी गुन्यांव नोंद करून अनंत कदम हाच्या कुटुंबाची जबानी घेतली. पुलीस अनंत कदमाचो सोद घेतात. दक्षीण गोंय पुलीस अधिक्षक टिकम सिंग वर्मा हांच्या मार्गदर्शना खाला पुलीस उपनिरिक्षक योगश गांवकार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
