भांगरभूंय | प्रतिनिधी
गोंयचे दक्षीणे कडलो म्हाल काणकोण आनी काणकोण म्हालांतल्यां पैंगीण गांवांत जावपी ही फामाद गड्यांची जात्रा. दर
तीन वर्सांनी जावपी ही जात्रा मे म्हयन्यांत जाता. ताका लागून ह्या गांवचे लोक देशाच्या खंयच्याय वाठारांनी काम जरी करता आसत जाल्यार लेगीत चुकनासतना ते ह्या जात्रेक येतात. जात्रेची सुरवात जाता ती कोंडो फोडून. उपरांत श्रीबेताळ देवाच्या देवळा मुखार आठ दीस वेगळे वेगळे जागर जातात. पेरनी जागर, दैत्या जागर, चोरांचो जागर आनी दिवजां जागर. दिवजां जागराचे पयल्या दिसा गड्यांक तेल काडपाचें शास्त्र जाता. दिवजां जागर फांतोडेर जाले उपरांत त्या दिसा दनपारच्या तिनाक अशी जात्रेक सुरवात जाता.
ह्या जात्रेचे मुखेल आकर्शण म्हळ्यार राटार बांदिल्लें गडे. चार गडे त्या दिसा मुळवीर – खावट ह्या पवित्र जाग्या वयल्यान भारा सयत श्रीबेताळा देवळा कडेन येतात तेन्ना बेताळ देवाचो अवसर येवपी जाका आमी बेताळ म्हणटात आनी ताचे बराबर नवदुर्गा देवीची तरंगां गड्यांच्या येवकाराक रावतात. तांकां अवसरा सकट देवाची बांय हांगा व्हरून गड्यांक न्हाणोवपाचें शास्त्र जाता. उपरांत थंय टको वाचन जाता. हें सगलें जाले उपरांत गड्यांक देवळांत हाडटात तेन्ना धोलाच्या आनी शमेळाच्या तालार गडे नाचतात. 45 फूट दोन खांब्याचेर चक्रा आकारांचो राट बांदिल्लो आसता. एक हांतात तलवार दुसऱ्या हांतात लेंस, गळ्यांत फुलांची माळ आनी फाटीक तोपिल्लें गरे. देवळाच्या मुखार हे गडे नाचतात आनी मागीर खांब्यांचेर चडटात. तेन्ना तांकां त्या राटाक घट्ट बांदतात आनी मागीर राटाक बांदिल्ल्या गड्याक घुंवडायतात तेन्ना सकयल आशिल्ले लोक नाचतात. चार गड्यां मदलो म्हालगडो (मुखेल गडो) लोलयें, पैंगीण, आनी खरगाळ ह्या तीन गांवचें लोकांक विचारता लोलयेंकार आयले ? पैंगीणकार आयले ? खरगाळकार आयले ? खुशी जाले ? तेन्ना त्या त्या गांवच्या लोकांनी हयकार दिले उपरांत चक्रा राट परत एकदा घुंवडायतात, आनी हें पळोवपाक हजारांनी लोक थंय जमिल्ले आसतात.
जेन्ना हें पळोवन लोकांचें मन भरता तेन्ना गड्याक राटा वयल्यान सकयल देंवयतात. हें सगलें जालें उपरांत त्या रातचें गड्याक गरे तोपून जाल्ली दुखापत भरून येवपाक तांच्या घरा उकडिल्ल्या भाताचो तांचे फाटीक उब दितात. ताचें उपरांत एक सप्तक देवूळ बंद दवरतात. त्या दिसांनी कसलीच देवाची धर्मीक विधी जायना. आठव्या दिसा देवाक न्हाणयतात आनी दुसऱ्या दिसा रंगावली पुजा जातकच जात्रा सोंपता.
गौतम पागी
963718171
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
