भांगरभूंय | प्रतिनिधी
हेल्मेट नासप आनी ड्रंकन ड्रायविंग हीं मरणाचीं मुखेल कारणां
पणजी : रस्त्याचेर वाहन चलोवप हीच एक व्हड जापसालदारकी आसता. वाहन चलयतना जापसालदारकी कळपा खातीर विद्यालय पांवड्यावेल्यान रस्तो सुरक्षेचे धडे दिवपाची गरज आसा. हॅल्मेट नासप आनी ड्रंकन ड्रायविंग ही अपघातांत मरण येवपाचीं मुखेल कारणां, अशें पुलीस महासंचालक आलोक कुमार हांणी म्हणलें. राज्यांत वर्साक सरासरी ३०० जाणांक अपघातांत मरण येता, अशेंय तांणी सांगलें.
आल्तिनो वैश्वीक रस्तो सुरक्षा सप्तका निमतान जाल्ले कार्यावळी वेळार उलयतना आलोक कुमार हांणी हें मतप्रदर्शन केलें.
कार्यावळींत रस्तो सुरक्षे विशीं जागृताय तशेंच प्रशिक्षण दिलें. येरादारी पुलीस रस्तो सुरक्षे विशीं सगल्याक विवीध तरेन जागृताय करतात. वाहन चलोवप्यां मदीं शिस्त निर्माण जाली, जापसालदारकेचें भान आयलें, जाल्यारूच पुलिसांच्या यत्नांक येस आयलें अशें म्हणपाक मेळटलें. रस्त्यार वाहन चलोवचे पयलीं दरेकल्यान स्वता वांगडा हेरांचे सुरक्षेचे भान दवरपाक जाय. खंयचीय बरी संवय ही ल्हानपणा सावनूच लागपाक जाय. रस्तो सुरक्षा आनी वाहन चलयतना गरजेच्यो आशिल्ल्या जापसालदारीं विशीं अशेंच म्हणचें पडटलें. हाका लागून ह्यान फुडें विद्यार्थी आनी तरणाट्यांक रस्तो सुरक्षेचे धडे दिवपाचेर भर दितले, अशें आलोक कुमार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
