आतंकी आनी तांचे ‘आका’ सावधान !

भांगरभूंय | प्रतिनिधी

– भारत – पाकिस्तान तणावाचेर प्रधानमंत्री मोदी उलयलें

– शिमेचेर आमचे सैन्य तैनात, गॅर्र सोंपूंक ना, स्थगीत

– एक दीस पाकिस्तानाक आतंकवाद सोंपयतलो

– कसलोच न्युक्लियर ब्लॅकमेल खपोवन घेवचें नात– ‘एक चुटकी सिंदूर की किमत’ पाकिस्तानाक कळ्ळां आसतलींच

खबरां संस्था

नवी दिल्ली : भारत आनी पाकिस्ताना मदीं सुरू आशिल्ल्या गॅर्राक पूर्णविराम मेळूंक ना, अर्दविराम मेळ्ळा. सध्या परिस्थिती नियंत्रणांत आसा, तरी आमचे सैन्य शिमेचेर तैनात आसा आनी रावतलें. पाकिस्ताना वांगडा आतां चर्चा जातली ती पीओके आनी आतंकवादाचेरूच. ह्यान फुडें कसलोच न्युक्लियर ब्लॅकमेल खपोवन घेवचें नात, आतंकी आनी तांचें आका, दोगांकूय वेगळे पळोवचें नात, कोणाकूच सोडचें नात, अशी शिटकावणी प्रधानमंत्री नरेंद्र मोदी हांणी पाकिस्तानाक दिली.

पाकिस्ताना आड गॅर्र सुरू जाल्या उपरांत पयलेंच फावट प्रधानमंत्री नरेंद्र मोदी पयलेंच फावट ऑन स्क्रीन उलयलें. ‘एक चुटकी सिंदूरकी किमत’ पाकिस्तानाक कळ्ळां आसतलीच, फुडाराक असले प्रकार, आतंकवाद कशेंच खपोवन घेवचें नात. आमी पाकिस्तानाचेर हल्लो करून फकत इमारती मोडूंक ना, आतंकवाद्यांचें मनोबळ मोडलां. भारता मुखार पाकिस्तानाचें मिसायल, ड्रोन चलूंक ना, आमची सुरक्षा प्रणाली कितली बरी आसा हें पुराय संवसारान पळयलें. पाकिस्तानान शिमेचेर झूज करपाची तयारी केल्ली आमी तांच्या छातयेचेर वार केलो, अश्या शब्दांत प्रधानमंत्र्यान भारताचे येस सांगलें. 

पाकिस्तानाक ज्या एअर बेसाचेर गर्व आशिल्लो तो एअर बेस कांय खिणांत आमी काबार केलो. भारताच्या आक्रमणान पाकिस्तान इतलो हाल्लो की आतां आनी प्रतिकार करप शक्य ना अशें म्हणून 10 तारखेक तांणी आमच्या डीजीएमओ कडेन संपर्क केलो, अशी म्हायतीय तांणी दिली.

पाकिस्तानान आतंकवादाक पोसून परत हल्लो केलो जाल्यार ताचें परिणाम तांकां भोगचें पडटलें, अशी शिटकावणीय प्रधानमंत्र्यान दिली.

मेड इन इंडिया शस्त्रांचो वेळ

हें यूग झूज करपाचें न्हय, तशेंच आतंकवादाचेंय न्हय. आतां मेड इन इंडिया शस्त्रांचो वेळ आयलां. पाकिस्तानाक स्वताक वाटोवपाक जाय जाल्यार तांणी पयलीं आतंकवाद्यां खातीरची साधन-सुविधा नश्ट करची पडटली. आतंकवाद आनी चर्चा, तशेंच ट्रेड एकठांय फुडें वचपाक शकना, अशें मोदी हांणी म्हणलें.