भांगरभूंय | प्रतिनिधी
पणजी : हवामान खात्यान 13 आनी 14 मेक वादळी वाऱ्या सयत पावसाची शक्यताय उक्तायल्या. ते प्रमाण ह्या दोन दिसां खातीर पावसाचो यलो अलर्ट जारी केला. 15 आनी 16 मेक किरकोळ पावसाची शक्यताय आसा. सोमारा पणजे चडांत चड 35.5 जाल्यार उण्यांत उणें 27.6 अंश सेल्सियस तापमानाची नोंद जाल्या. मुरगांवचें चडांत चड तापमान 35 जाल्यार उण्यांत उणें तापमान 26.8 अंश सेल्सियस आसलें. सोमारा गोंयांत कांय कडेन पावसाची नोंद जाल्या.
पुडले स दीस गोंयांतलें चडांत चड तापमान 35 अंश जाल्यार उण्यांत उणें 27 अंश सेल्सियस आसपाची शक्यताय आसा. हवामान खात्यान गोंयांत 17 आनी 18 मेक दमट आसतलें, अशी शक्यताय उक्तायल्या.
गोंयांत 1 मार्च ते 12 मे मेरेन सरासरी 13.9 मिलिमिटर पावसाची नोंद जाल्या. अंदूं पावसाचें प्रमाण 18.1 टक्क्यांनी उणें आसा. 13 ते 16 मे मेरेन वाऱ्याची गती वराक 45 ते 55 किलोमिटर मेरेन पावपाची शक्यताय आसा. ते खातीर नुस्तेमारांनी दर्यांत वच्चें न्हय, असो उलो खात्यान मारला.
मॉन्सून फुडें सरता
मॉन्सून 13 मे मेरेन अंदमान निकोबारच्या कांय वाठारांनी पावपाची शक्यताय आसा. फुडल्या चार-पांच दिसांनी मॉन्सून दक्षीण अरबी दर्यांत, पुराय अंदमान निकोबर जुंव्याचेर दाखल जावपा खातीर फावोशें वातावरण आसा, अशें हवामान खात्यान स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
