भांगरभूंय | प्रतिनिधी
कुळागरांची तपासणी करपाचे भलायकी खात्याचे निर्देश
भांगरभूंय । प्रतिनिधी
पणजी : गोंयांतल्या कांय कुळागरांनी जळारांची पैदास जावन थंय कांय जाणांक डेंग्यूची लागणी जाल्ली. हे फाटभुंयेर भलायकी खात्या वतीन कृशी अधिकाऱ्याक सतर्क रावपाचे निर्देश दिल्या. तांकां कुळागरांची तपासणी करपाक सांगलां. ते भायर खात्या वतीन नितळ कुळागर सर्तीचें आयोजन केलां. हे वरवीं कुळागरांचे धनी आपापल्या वाठाराची नितळसाण करतले अशी आस्त आसा. पोरूंचे तुळेंत अंदूं गोंयांत डेंग्यूचे दुयेंती तिपेटीन उणे जाल्ल्याचें राष्ट्रीय वेक्टर बोर्न दुयेंस नियंत्रण कार्यावळीची उपसंचालक डॉ. कल्पना महात्मे हांणी सांगलें.
गोंयांत मान्सूनपूर्व पावसाक सुरवात जाल्या. कुळागरांनी उदक सांचून जळारांची पैदास जावपाची शक्यताय आसता. अश्या वेळार वाठार नितळ दवरप गरजेचें आसता. खात्या वतीन पोरूं हॉटस्पॉटांचेर नितळसाण, वखदां मारप, जळारांच्यो पैदास जावपाच्यो सुवातो नश्ट करप अशीं विवीध कामां चालू आसात.
गोंयांत जानेवारी ते एप्रील 2024 चे तुळेंत 2025 ह्या चार म्हयन्यांच्या काळांत डेंग्यूच्या दुयेंतींची संख्या तिपेटी परस अदीक उणी जाल्या. जानेवारी ते एप्रील 2024 त गोंयांत डेंग्यूचे 95 दुयेंती सांपडिल्ले. जाल्यार 2025 त ह्याच चार म्हयन्यांच्या काळांत डेंग्यूचे 29 दुयेंती सांपडल्यात.
जानेवारी 2025 त 7, फेर्बुवारींत 9, मार्चांत 7 जाल्यार एप्रीलांत 6 दुयेंती सांपडिल्ले. एप्रीलांत सांपडिल्ली सगले 6 दुयेंती उत्तर गोंयांतले आसले. तातूंत म्हापश्यां 2, हळदोण्यां, पेडण्यां, कांदोळी आनी शिवोली दरेकी 1 दुयेंती सांपडिल्लो. खात्या वतीन स्थलांतरीत कामगार वस्तींत वा बांदकाम प्रकल्पांत रावपी कामगारांच्या वाठारांत तपासणी करतात. उदक सांचपाक दिवचें न्हय, सांठयल्लें उदक उदक धांपूव दवरप, वाठार वेळावेळार नितळ करप अश्यो सोंप्यो गजाली केल्यार डेंग्यूचे दुयेंती आनीक उणे जातले, अशें डॉ. महात्मे हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
