भांगरभूंय | प्रतिनिधी
तीन उमेदवारांनी भरिल्ले अर्ज
पेडणें : कामुर्ले सरपंचपदा खातीर सोमारा वेंचणूक जाली. हातूंत तिगांनी उमेदवारी अर्ज सादर केल्ले. सात मदलीं चार मतां घेवन एल्वीस अँथनी डायस हे सरपंच जाले. पंचायतीचीं जीं कामां उरल्यांत तीं पुराय करपाचेर लक्ष दितलों, अशें डायस हांणी सांगलें.
कामुर्ले सरपंचपदाचो बासिलो फर्नांडीस हांणी राजिनामो दिल्लो. ताचे उपरांत हें पद रितें आशिल्लें. सरपंचपदा खातीर सोमारा सकाळीं वेंचणूक जाहीर केल्ली. सोमारा सकाळीं कामुर्ले पंचायतीच्या सात पंच वांगड्यां मदल्या तिगांनी सरपंचपदा खातीरचे अर्ज वेंचणूक निर्णय अधिकार्यां कडेन सादर केल्ले. मतदार प्रक्रिये उपरांत सगल्यांत चड चार मतां एल्विस अँथनी डायस हांकां मेळ्ळीं. आदले सरपंच बासिलो फर्नांडीस हांका दोन मतां मेळ्ळीं. जाल्यार अँथनी फर्नांडीस हांकां एक मत मेळ्ळें. वेंचणूक निर्णय अधिकार्यां कडल्यान सरपंचपदार एल्विस डायस हांची निवड जाहीर करून तांकां प्रमाणपत्र दिलें.
पंचायत जी कामां सध्या करता, तीं पुराय करपाक यत्न करतले. तशेंच पंच वांगड्यां कडेन चर्चा करुन आनी तांकां विस्वासांत घेवन फुडलीं उदरगतीचीं कामां करतले, अशें नवे सरपंच डायस हांणी सांगलें.
आदले सरपंच बासिलो फर्नांडीस हांणी, सरपंचपदार निवड जाल्ल्या एल्विस डायस हांकां फुडले वाटचाली खातीर परबीं. जंय तांकां सहकार्याची गरज आसतलीं थंय तांकां फाटबळ दितलों अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
