भांगरभूंय | प्रतिनिधी
दिवचले बांदतात ६० कोटींची इमारत
दिवचल: साधन सुविधा महामंडळा वतीन सुमार ६० कोटी रुपया खर्चून दिवचले येवपी प्रशासकीय इमारत आनी ६०० प्रेक्षकांची तांक आशिल्लो कलाभवन प्रकल्प आधुनीक सुविधांनी सज्ज आसतलो. हो राज्यांतलो पयलो इंटिग्रेटेड प्रकल्प, अशी म्हायती आमदार डॉ. चंद्रकांत शेटये हांणी दिली.
आयज दिवचले ६० कोटींच्या प्रशासकीय इमारतीच्या बांदकामाची मुख्यमंत्री डॉ. प्रमोद सावंत हांचे हस्तुकीं बुन्याद घाली. ह्या वेळार आमदार डॉ. शेटये उलयताले.
आमदार शेटये हांणी सांगलें, हो प्रकल्प सुमार ९८४ चौरस मिटर वाठारांत येतलो. सुमार १२० गाडयांची पार्कींग आसतली. पयले माळयेर लॉबी रिसेप्शन, ऑडिटोरियम, ग्रीन रूम, फूड कावंटर, सरकारी कार्यालय, वाचनालय, टॉयलेट, ब्लॉक ओपन पोडीएम आनी हेर सुविधा आसतल्यो. दुसरे माळयेर तलाठी कार्यालय, म्युटेशन सेल, कंट्रोल रूम, मामलेदार कार्यालय, कोर्टरूम, बॅलेट बॉक्स, स्ट्रॉंग रूम, बाल भवन आसतलें. तशेंच अप्पर लेवल एन्ट्री ऑडिटोरियमांत आसतलें. तशेंच टॉयलेट ब्लॉक आसतलें.
तिसरे माळयेर मतदारां खातीर सुविधा सेंटर तशेंच वेंचणूक कर्मचारी खातीर वेवस्था, प्रशिक्षण सेंटर, सहाय्यक लेबर कमिशनर कार्यालय, उपजिल्हाधिकार्यांचे कार्यालय, हॉल, ऑडिटोरियम, टॉयलेट ब्लॉक आसतलो. चवथे माळयेर एअर कंडिशन उक्तें सभाघर आसतलें. अशी म्हायती तांणी दिली.
आदली मामलेदार कार्यालय इमारत आसा तशीच दवरून कुशीक मेकळे सुवातेर कला भवन प्रशासकीय संकुल उबारतले. आदले इमारतीक नवें चित्र दितना पुराय संकुलाक आधुनीक सुविधांनी भरिल्लें संकुल करतले. दिवचलच्या लोकांचें बर्याच वर्सांचें सपन येवपी दोन वर्सांनी पुराय जावपाचें आशिल्ल्यान बरीच खोस भोगता, अशें आमदार डॉ. शेट्ये हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
