भांगरभूंय | प्रतिनिधी
मडगांव : राय पंचायतींत भितरल्या राजकारणाक लागून आरोप प्रत्यारोप ह्यान पयलीं जाल्ले. आतां राय पंचायतीच्या स पंच वांगड्यांनी उपसरपंच गॉडफ्री ओसवल्ड सुझा हांचे आड अविस्वास थाराव हाडला. सोमारा सकाळीं बीडिओं कडेन हे विशींचो थाराव सादर केलो.
राय पंचायतीच्या उदरगतीच्या कामां वेल्यान कांय दिसां आदीं सरपंचांनी सचिवांचेर प्रस्ताव मुखार धाडिनाशिल्ल्याचे केल्ले आरोप सचिवांनी भायर मारिल्ले. उपरांत कांय पंचानींय पत्रकार परिशद घेवन राय पंचायतींतल्यान, सत्ताधारां कडल्यान चुकीच्या कागदपत्रांचे मजतीन कामां दिल्लीं. हाका लागून ऑडीटा सयत उदरगतीच्या कामांक निधी मेळटना आडमेळीं निर्माण जातल्यो अशें सांगिल्लें. आतां परत राय उपसरपंच गॉडफ्री ओसवल्ड सुझा हांचे आड अविस्वास थाराव दाखल केल्ल्यान राय पंचायत चर्चेंत आयल्या.
आंतानिओ झेविअर फर्नांडीस, मान्यूएल रॉड्रिग्ज, पीटर क्वाद्रोस, जुडास क्वाद्रोस, मिंगुलिना डिसोझा, क्विनी डिकॉस्टा ह्या स पंच वांगड्यांच्या सयां सयत पत्र गटविकास अधिकार्यांक सादर केलां. हातूंत उपसरपंच पंच वांगड्यांक सहकार्य करिना, निर्णय घेतना पंचांक विस्वासांत घेनात, असो दावो केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
