भांगरभूंय | प्रतिनिधी
भांगरभूंय । प्रतिनिधी
दिवचलः सुविशांत बोर्डेकार हांच्या परिवारा वतीन बोर्डें दिवचलच्या स्वर सिद्ध्या संगीत विद्यालयांत आयतारा लाडफें हांगा गुरु पुनव उमेदीन मनयली. मानेस्ताचे हाजेरींत ज्येश्ठ हार्मोनिअम वादक अजीत वेळुस्कार आनी ज्येश्ठ शिक्षक बाळकृष्ण गवस हाचे हस्तुकीं दिवली पेटोवन कार्यावळीक सुरवात जाली. ह्या वेळार लाडफेंचो ज्येश्ठ भजनी कलाकार बापू मळीक, सुविधा विनायक बोर्डेकार, संगीत शिक्षक विद्धाकर बोर्डेकार, स्वर सिद्ध्या विद्यालयाची अध्यक्ष समृद्धी बोर्डेकार माचयेर आशिल्ली.
सरस्वती, महर्शी व्यास आनी स्वर सिद्धाचो संस्थापक सर्गेस्त विनायक बोर्डेकार हांच्या फोट्यांक फुलां हार घालून ताचें पूजन केलें. अजीत वेळुस्कारान रियाजाचें म्हत्व पटोवन दिलें. बाळकृष्ण गवस हांणी गुरू- शिश्य नात्या विशीं म्हायती दिली. शिश्यांनी गुरुची पाद्यपूजा करून आशिर्वाद घेतले. संगीताची कार्यावळ तांणी सादर केली. साईज्ञा बोर्डेकरान गुरू वंदना म्हणली, हर्ष परब, साईश दिवकार, विराज गवस, त्रिशा शेट्ये, सोहम मळीक, शुभम चोडणकार, रजत कारबोटकार, साईदीप कारबोटकार हांणी तबलें वादक केलें. रिद्धी शेट्ये, शिवेन चोडणकार, पांडुरंग (उर्वेश) मोरे, तेजस मळीक, सोहम कारबोटकार, तनिष्का बोर्डेकार हांणी हार्मोनिअम वादन केलें. तांकां सिद्धाकर बोर्डेकार, आनंद नायक, सुविशांत बोर्डेकार हांणी साथ संगत केली.
अजीत वेळुस्कार हांचो बाळकृष्ण गवस हाचे हस्तुकीं भोवमान केलो. अखील गांधर्व म्हाविद्यालयान घेतिल्ले संगींत परिक्षेंत पास जाल्ल्या विद्यार्थ्यांक मानेस्ताचें हस्तुकीं प्रमाणपत्रां दिली. भैरवीन कार्यावळीचो समारोप केलो. सूत्रसंचालन साईज्ञा बोर्डेकार हिणे केलें आनी समृद्धी बोर्डेकारान उपकार मानले.
—————————————————————
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
