भांगरभूंय | प्रतिनिधी
हरयाणांतले टोळये कडल्यान ७५ लाखांचो सोरो जप्त
पणजी : गोंयांत भायल्या राज्यांतल्यान बेकायदेशीरपणान सोर्याची आयात करपी टोळयेक गोंय उत्पादन शुल्क विभागान धरलें. ही कारवाय राज्याचे शिमेचेर पेडणेंच्या पत्रादेवी चेकपोस्टार केली. हरियाणांतले एके सोर्याचे कंपनीन उच्च दर्जाचो सोर्याचो सांठो ‘कस्टम्स’ खातीर आशिल्ल्याचें दाखयत गोंयांत बेकायदेशीरपणान धाडपाचो यत्न केलो.
हे विशीं चड म्हायती प्रमाण, हरियाणांत नोंदणी आशिल्ल्या ट्रकांतल्यान चिव्हास रीगल, अब्सोल्यूट व्होडका, जॉनी वॉकर, ब्लॅक लेबल असल्या उंचेल्या ब्रँडाच्यो सोर्या बाटल्यो सांपडल्यो. हाची किंमत सुमार ७५ लाख रुपया आसा. मात, ह्या सोर्याच्या सांठ्याची येरादारी करपाक चालका कडेन परवानगी नाशिल्ली, सोर्याच्या बाटल्यांचेर लेबलूय नाशिल्लें. तशेंच कस्टम क्लीयरन्सूय नाशिल्लो. ह्या प्रकरणांत ट्रकचालकाक अटक करून तांची चवकशी केली. तांणी सुरवातेक ही कस्टम्स विभागा खातीर आशिल्ली माल येरादारी आशिल्ल्याचें सांगलें. मात, ट्रकांतल्यो बाटल्यो ७५० मिलीच्यो आशिल्ल्यो,ज्यो फकत किरकोळ विक्रे खातीर वापरतात. अधिकार्यांनी खोलायेन चवकशी केली तेन्ना चालकान केल्ल्या दाव्यांत घोटाळो उक्ताडार आयलो.
उपरांत जंय हो सोर्याचो सांठो व्हरपाचो आशिल्लो त्या आल्त पिळर्णच्या एका गुदांवाचेर अधिकार्यांनी धाड घाली. गोंयांत अशे तरेची ही पयलीच येरादारी आशिल्ली. अशें तपासांतल्यान स्पश्ट जालें. आतां हे हरियाणांतले कंपनीचे गोंयांतले घावूक वेवसायाचे परवाने रद्द जावपाची शक्यताय आसा.
संबंदीत कंपनी कडल्यान अशेच तरेचें आनीक नेटवर्क राज्यभरांत सक्रिय आसपाची शकयता आशिल्ल्यान ताचो तपास सध्या सुरू आसा. धरिल्ल्या ट्रक चालकाक तात्पुरतो जामिनाचेर सोडला. तरी, ह्या सोर्याचो दर्जो आनी प्रकरणाची मुळां तपासतात. गोंयांत ह्यान पयलीं अशे तरेन ’कस्टम्स’च्या नांवाखाला बेकायदेशीर सोरो हाडपाचे प्रकार उक्ते जावंक नाशिल्ले. हाका लागून ही कारवाय उत्पादन शुल्क विभागा खातीर व्हडलें येस आशिल्ल्याचें मानतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
