भांगरभूंय | प्रतिनिधी
पणजी : ज्युनियर स्टेनोग्राफर पदाची दुसरी सीबीटी परीक्षा (सीबीटी – ३) आसूं वा हेर खंयचीय परीक्षा एका उमेदवारान दोन फावटीं दिल्यार संबंदीत उमेदवारान पयले फावटीं दिल्ले परीक्षेंतले गूण मान्य करतले. गोंय कर्मचारी भरती आयोगान नोटीस जारी करून ही सुचवणी दिल्या. एलडीसी पदा खातीर जाल्ली सीबीटी परीक्षा ३० उमेदवारांनी दोनदां दिली. हाका लागून आयोगान हें स्पश्ट केलां.
एलडीसी पदा खातीरच्यो दोनूय सीबीटी परीक्षा जाल्या, ताचे निकालूय अयल्यात. ज्युनियर स्टेनोग्राफर पदाची दुसरी सीबीटी परीक्षा (सीबीटी ३) २५ मेक जातली. कांय उमेदवार विवीध गटां खातीर (सर्वसामान्य, इडब्लूएस) स्वतंत्रपणान अर्ज सादर करतात. वेगवेगळीं ऍडमीट कार्डां जारी जाल्ल्यान ते दोनदा (दरेका गटा खातीर) परीक्षेक बसतात. अशा उमेदवारांचे पयले दिल्ले परिक्षेचेच गूण मान्य करतले, अशें आयोगान कळयलां.
उदेवारांनी दोन फावटीं परिक्षेक बसचें न्हय. दोन अर्ज भरिल्ल्यान ऍडमीट कार्ड दोन जरी मेळ्ळ्यांत तरी दोनदां परीक्षेक बसपाची गरज ना. एलडीसी पदा खातीरचे सीबीटी परीक्षेक ३० उमेदवार दोनदां बसले. उमेदवारांचो आंकडो चड आशिल्ल्यान ही परीक्षा विवीध सुवातांचेर चड दीस घेवची पडली. हाका लागून कांय उमेदवारांक दोनदां परिक्षा दिवप सहज शक्य जालें, अशी म्हायती कर्मचारी भरती आयोगाचे सचीव शशांक ठाकूर हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
