रशियन तकटे नाकात, २५ मिटर रुंदायेचे रस्ते नाकात

भांगरभूंय | प्रतिनिधी

मोरजी ग्रामसभेंत साबार थाराव मंजूर

पेडणें: मोरजी पंचायत वाठारांत व्हडा प्रमाणांत हॉटेल वेवसायीक रशियन तकटे लायतात. तांचेर कारवाय करची, अशी मागणी ग्रामस्थांनी ग्रामसभेंत केली. सरपंच पवन मोरजे हांणी शब्द दितना संबंदीत धनयांक रशियन भाशे सुवातेर इंग्रजी, कोंकणी, मराठी भाशेंतल्यान तकटे लावपाच्यो सुचवण्यो करतलों अशी गवाय दिली. तशेंच तेमवाडो मोरजेच्या दर्यादेग वाठारांत पर्यटन खात्या खाला जे पार्कींग वेवस्था प्रकल्प उबारतात ते सरकारी कायद्या प्रमाणूच उबारचे अशी सुचवणी ग्रामस्थांनी केली. तशेंच उदकाची समस्या, गांवांत २५ मिटरचे रस्ते रुंदीकरण नाकाच, असोय थाराव मंजूर केलो.
मोरजेचे ग्रामसभेक सरपंच पवन मोरजे, उपसरपंच सुप्रिया पोके, पंच मंदार पोके, पंच रजनी शिरोडकार, पंच स्वप्निल शेट गांवकार, पंच सुरेखा शेटगांवकार, पंच फटू शेटगांवकार, पंच विलास मोरजे, पंच मुकेश गडेकार आनी हेर हजर आशिल्ले.
पवन मोरजे हांणी लहराई देवीच्या भक्तांचेर जें अपसरण आयलेंं, तशेंच भारत-पाकिस्ताच्या झुजांत जे भारतीय जवान शहीद जाले, तांकां आर्गां ओपलीं. पंचायत सचिव धावसकार हांणी फाटले बसकेचो इतिवृत्तांत वाचून कायम केलो. पंचायतीच्या जमाखर्चाक आनी अर्थीक बजेटाक मंजुरी दिली.

पार्कींग वेवस्था कायदेशीर करात
मोरजेच्या तेमवाडो दर्यादेग वाठारांत पर्यटन खात्या खाला णव कोटी रुपया खर्च करून पार्कींग प्रकल्प उबारपाचें काम सुरू आसा. ती वेवस्था सरकाराचे सगले कायदेशीर परवाने घेवनच पुराय करचे, अशी मागणी ह्या वेळार ग्रामस्थांनी केली.

२५ मिटर रुंद रस्तो कोणाक
गोविंद पोके हांणी मोरजेच्या गांवां खातीर २५ मिटरचो रस्तो कोणें आनी कित्याक केलो? असो प्रस्न केलो तेन्ना सरपंच पवन मोर्जे हांणी, हो रस्तो रूंद करपाक वा जमीन संपादन करण्याची प्रक्रिया जाली. मात आयज मेरेन हाका कोणेंच आक्षेप घेवंक ना. जर २५ मिटर रुंदायेच्या रस्त्याक विरोध आसल्यार तसो थाराव मंजूर करून संबंदीत खात्याकडेन धाडटलों अशें सांगलें.
पंचायत कर्मचारी जे वेळार येनात तांचेर पंचायत सचिवांनी आनी वांगड्यांनी नियंत्रण दवरचें, अशी मागणी ग्रामस्थांनी केली.