भांगरभूंय | प्रतिनिधी
अहवालाचो पुराय अभ्यास करूनूच भाश्य करतलों : मुख्यमंत्री
भांगरभूंय । प्रतिनिधी
पणजी : शिरगांवचे लयराई देवीचे जात्रे वेळार घडिल्ले खेटाखेटीक आदली जिल्होधिकारी स्नेहा गीते, आदले पुलीस अधिक्षक अक्षत कौशल, दिवचलचे आदले उपअधिक्षक जिवबा दळवी, आदले निरिक्षक दिनेश गडेकार, आदले उपजिल्होधिकारी भीमनाथ खोर्जुवेंकार हांचे सयत देवस्थान समिती आनी पंचायत सचीव लेगीत दोशी आसा, असो अहवाल चवकशी समितीन मुख्यमंत्री डॉ. प्रमोद सावंत हांकां सादर केला.
पुराय अहवालाचो नियाळ घेतले उपरांतूच आपूण ताचेर भाश्य करतलों, अशें मुख्यमंत्री डॉ. सावंत हांणी शेनवारा पत्रकारां कडेन उलयतना सांगलें.
गोंयांतलो सगल्यांत व्हडलो उत्सव आशिल्ले लयराई देवीचे जात्रेंत अंदूं पयलेच खेपे खेटाखेट जाली. तातूंत स जाणांक मरण आयलें जाल्यार 80 परस अदीक भावीक जखमी जाले. जखमींक सांखळी, दिवचल भलायकी केंद्रां सयत म्हापशेंच्या आझिलो आनी जीएमसींत उपचारा खातीर दाखल केले. जीएमसींत उपचार घेवपी पांचांतल्या तिगांची भलायकी अजून लेगीत गंभीर आसा.
हे घडणुकेची खोलायेन चवकशी करचे खातीर सरकारान महसूल सचीव संदीप जॅकीस हांचे अध्यक्षते खाला समिती स्थापन केल्ली. हे समितीन घडणुकेचे सुवातेर वचून तशेंच प्रत्यक्षदर्शी कडेन चर्चा क रून पांच दिसां उपरांस सुमार 100 पानांचो अहवाल तयार करून तो बिरेस्तारा रातीं उसरां मुख्य सचीव डॉ. व्ही. कांडावेलू हांकां सादर केलो. तातूंत हे समितीन खेटाखेटीचे घडणुकेक आदली जिल्होधिकारी स्नेहा गीते, आदले पुलीस अधिक्षक अक्षत कौशल, दिवचलचे आदले उपअधिक्षक जिवबा दळवी, आदले निरिक्षक दिनेश गडेकार, आदले उपजिल्होधिकारी भीमनाथ खोर्जुवेंकार हांचे सयत देवस्थान समिती आनी पंचायत सचीव जापसालदार आशिल्ल्याचें म्हणलां. पूण चवकशी समितीन सादर केल्ल्या अहवालाचो आपूण नियाळ घेतां. पुराय अभ्यास करुनूच आपूण ताचेर भाश्य करतलों, अशें मुख्यमंत्री डॉ. सावंत हांणी स्पश्ट केलें. मजगतीं, चवकशी समितीन अहवालांत जांचेर ठपको दवरला, तांच्यो सरकारान तत्काळ बदल्यो केल्यात. आतां अहवाला उपरांत तांचेर कसली कारवाय जातली हाचेर सगळ्यांचें लक्ष आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
