भांगरभूंय | प्रतिनिधी
भावंडांनो,
माय तापपाक लागला. म्हणल्यार दिसान दीस तापमान वाडत आसा. भोंवतणच्या हवेंतलो उबाळ वाडत आसा. फुडल्या सप्तकांक हवामानांतलें तापमान चडांतचड 35 ते 37 अंश सेल्सियस आनी उण्यांत उणें 27 अंश सेल्सियस ते 28 अंश सेल्सियस इतलें वाडपाची शक्यताय हवामान खात्यान उक्तायल्या. भावंडांनो, तुमची कूड नाजूक आशिल्ल्यान ह्या तापमानाचो, गरमेचो, उबाळाचो तुमचेर सहजतायेन परिणाम जावंक शकता. तशेंच तुमी म्हजी अपुरबायेचीं भावंडां आशिल्ल्यान ह्या उबाळाक जोडून आशइल्ल्यो कांय गजाली तुमकां सांगतां त्यो मतींत दवरात.
भावंडांनो, सगळ्यांत पयलीं याद दवरात ती उदक पिवपाची. भोंवतणचा गरमी वाडिल्ल्यान तुमकां परतून परतून तान लागतली. तातूंत तुमीं चड खेळत आशिल्ल्यान ती वाडप साहजीक. देखून उदक थंड न्हय आं. तापयल्लें, खतखतो आय़िल्लें. मागीर तें थंड जांव पुणून अदीं-मदीं पियत रावात. दनपारच्या साडेइकरा ते अडेच वरां मजगतीं भायर वतांत खेळूं नाकात. तुमची तकली वतांत तापिल्ली आसतना थंड पेयां वा फ्रिजांतलें थंड उदक पीवं नाकात. भोंवतणची गरमी वाडल्या म्हण हांव जाणा तुमी तळयेर, न्हंयचेर, झरीचेर वा दर्यार न्हांवपाक वतात. तळयेर, न्हंयचेर आनी दर्याचेर न्हातना खोल उदकांत वचूं नाकात. त्या सुवातांनी न्हांवपाक वतना इश्ट-इश्टिणींच्या वांगडाच रावात. एकोडीं रावू नाकात. दर्या वेळांनीं न्हांवपाक वतना जाण्टेल्यांचो आदार-सांगात सोडूं नाकात. ल्हारांची मजा लुटातूच पूण मुखार वचूं नाकात. ल्हारांवरवी पायांपोंदची रेंव केन्ना पोखरता आनी तुमी उदकांत आड पडटात तें कळना. शादूर रावात.
भांवडांनो, आंगार ल्हव, मोव, पातळ आनी सुती कपडे घालात. च्या कॉफी साप्प उणे प्रमाणांत पियात.
भावंडांनो, रस्त्याचेर सायकली चलयतना हेर वाहना सावन तुमी काळजी घेयात. तुमच्या हाता-पांयाच्या बोटांची नाकटां वाडोवं नाकात. तातूंत घाण सांचपाक दीवं नाकात. आंगार उबाळान म्हणल्यार गरमेन कसलीय पुळी आयली जाल्यार ती नाकटांनी खाजोवं नाकात.
भावंडांनो, पिकिल्ली फळां देखीक आंबे, आमल्यो, पणसुलां, काजू, तशेंच रावनटी फळां काण्णां, चुन्नां काडपा खातीर झाडां-रुखांचेर चडपाची पिशेपणां करूं नाकात. कोणाय जाणट्या कडल्यान तीं काडून घेवन खायात.
आनीक सगळ्यांत म्हत्वाचें म्हणल्यार.. भावंडांनो शोळेक सुटी पडल्या म्हूण बेकार आशिल्ल्यान रातडदीस मोबायल पळयत रावूं नाकात. मोबायलाचेर गेमी खेळत घरातूंच चड वेळ बसून रावूं नाकात. ह्या गरमेच्या दिसानीं तुमची भलायकी सांबाळप, बरी दवरप हें तुमच्याच हातांत आसा. आनी तुमी म्हजीं अपुरबायेचीं भावंडां आशिल्ल्यान दुबाव नासतना हावें सांगिल्ल्यो गजाली पाळटलीं अशी म्हाका खात्री आसा. विसरूं नाकात आं? उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
