भांगरभूंय | प्रतिनिधी
पणजी ः देशांत निर्माण जाल्ले झुजासारक्या परिस्थितींत गोंय पुलीस हाय अलर्टाचेर आसात. राज्यांतल्या म्हत्वाच्या सुवातींनी, पर्यटन थळां, दर्यादेग आनी हेर संवेदनशील सुवातींनी पुलीस सुरक्षा वाडयल्या. खास करून दर्यादेगेवेल्या पुलीस आनी पर्यटन पुलिसांक दुबावीत गजालींचेर बारीक नदर दवरपाचो आदेश दिला. विमानतळ, रेल्वे स्टेशनां, बस स्टँण्ड, बाजारपेठे आनी हेर गर्दीच्या सुवातींनी अतिरिक्त सुरक्षा तैनात करतले.
मेळिल्ले म्हायती प्रमाण, झुजा सारकी परिस्थिती पळोवन भारतीय राखीव बटालियन (आयआरबी) आनी गोंय पुलीस हांचो सुटयो रद्द केल्यांत. आणीबाणीच्या वेळार मनीसबळाचो उणाव येवचो न्हय हे खातीर हो निर्णय घेतलां. ते प्रमाण बॉम्ब विरोधी पंगड, आतंकवाद विरोधी पंगड आनी सुरक्षा खात्याक अतिरिक्त कर्मचाऱ्यांची वेवस्था केल्या. बिराडकार रावप्यांची आनी विदेशी नागरिकांची व्हड प्रमाणांत तपासणी मोहीम पुलिसांनी सुरू केल्या.
राज्यांतले सुरक्षा परिस्थितीचो नियाळ घेवपा खातीर मुख्यमंत्री डॉ. प्रमोद सावंत हांणी नियाळ बसका घेतिल्ली. ह्या वेळार आणीबाणीच्या परिस्थितींत करपाचे कारवाये वांगडाच राज्यांतल्या सुरक्षेचेर चर्चा जाली. हाचे भायर पुलिसांनी प्रतिबंधात्मक कारवाय वाडयल्या. राश्ट्रविरोधी घटकांची हालचाल जावची न्हय हे खातीर शिमेवयल्या तपासणी केंद्रांचेर तपासणी सुरू आसा. फेक न्यूज आनी चुकीची म्हायती पातळावपी सोशल मिडिया हँडलांचेरूय कारवाय सुरू आसा.
600 विदेशी नागरिकांची तपासणी
पुलिसांनी सुरू केल्ल्या खाशेल्या मोहिमेत आतां मेरेन 600 विदेशी नागरिकांची तपासणी केल्या. तशेंच 22,229 बिराडाक रावपी, 556 अनवळखी व्यक्ती, 515 काश्मीरी व्यक्तींची तपासणी केल्या. 2,467 दुबावीत लोकांक ताब्यांत घेतले. ह्या वेळार 1,413 हॉटेलां आनी गेस्ट हावसांची तपासणी जाली. वट्ट 153 कॉम्बिंग ऑपरेशन चालीक लायलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
