बिराडकार, पर्यटकांची म्हायती ‘पथिक’ ॲपात अपलोड करप सक्तीचें

भांगरभूंय | प्रतिनिधी

मडगांव : गोंयांत येवपी गुन्यांवकार चुकीची म्हायती दिवन हांगा रावतात. हाची दखल घेवन पुलीस अधीक्षकांच्या अहवाला प्रमाण दक्षीण गोंय जिल्लोधिकाऱ्यान बिराडकार आनी हॉटेलांनी आनी हेर आस्थापनांनी रावपी लोकांची वळखपत्रां घेवन पुलिसांक म्हायती दिवची. हॉटेल आस्थापनांनी ही म्हायती पथिक सॉफ्टवेअरांत घालची. भाडेकारुंची नोंदणी करनाशिल्ल्या आड गुन्यांव नोंद करपाचो आदेश जिल्लोधिकाऱ्यान उपजिल्लोधिकारी आनी दंडाधिकाऱ्यांक दिलां.
दक्षीण गोंय जिल्लोधिकारी एग्ना क्लिटस (आयएएस) हांणी राज्या भायल्यान येवपी भोंवडेकारांचे वाडट्या प्रवृत्ती विशीं हुस्को उक्तायला. ते खातीर कोणाकूय रावपाक दवरतना वळखपत्रां आनी हेर म्हायती घेवपाचे निर्देश जिल्लोधिकाऱ्यान दिल्यात. बिराडकार सत्यापन प्रक्रियेच्या आदेशा प्रमाण, घर धनयांनी आनी हॉटेल धनयांनी पुलिसांच्या पथिक प्रोग्राम फॉर अॅनालिसिस ऑफ ट्रॅव्हलर्स अँड हॉटेल इन्फॉर्मेटिक्स) ह्या सॉफ्टवॅरांत घालची पडटली.
हाचे भायर बिराडकारांची म्हायती पुलिसांक दिवपाची गरज आसा. जायते फावट गुन्यांवकारांची वळख करप कठीण जाता कारण गुन्यांवकारांनी हॉटेलांक आनी बिराडधनयांक दिल्ली म्हायती फटीची आनी चुकीची आसता अशें पुलिसांक दिसून आयलां. जायते फावटीं हॉटेलाचे धनी आनी घर धनी भाडेकरुंची फाटभूंय तपासनासतना जागो भाड्यान दितात.
कोणाकूय सुवात भाड्यान दितना घर धनयांनी, हॉटेल, लॉजिंग बोर्डिंग, रॉक्स, गेस्ट हावस, धर्मीक सुवातींची निवासी वेवस्था हांणी मतदार कार्ड, आधार कार्ड, पासपोर्ट, ड्रायव्हिंग परवानो आनी हेर वळखपत्रां तपासचीं. पथिक पोर्टलाचेर पर्यटकांची म्हायती भरची. जिल्लोधिकाऱ्यान आदेशांत दक्षीण गोंयांतल्या हॉटेल धनयांक आनी मालमत्तेच्या धनयांक कायद्याची अंमलबजावणी करपी हेर प्राधिकरणांक गरजे प्रमाण तपासणे खातीर मजत करची अशें सांगलां.
दक्षीण गोंयच्या पुलीस अधीक्षकान बिराडकारांची नोंदणी नाशिल्ली प्रकरणा आनी नेमाचें उल्लंघन केल्ल्याची प्रकरणा उपजिल्लोधिकारी आनी उपविभागीय दंडाधिकाऱ्यांक सादर करपाक सांगल्यात. ते प्रमाण दक्षीण गोंय जिल्लोधिकारी एगना हांणी बीएनएसएस 2023 च्या कलम 163 खाला अशा व्यक्तीं आड गुन्यांव नोंद करपाची सुचोवणी उपजिल्होधिकारी आनी उपविभागीय दंडाधिकाऱ्यांक दिल्या. हो आदेश 9 मे सावन 60 दिसां खातीर लागू जातलो.

सुरक्षे विशीं राष्ट्रीय बँकांक निर्देश
दक्षीण गोंय जिल्ह्यांत आशिल्ल्या राष्ट्रीय बँकांक एटीएमाचेर सतत सुरक्षा दवरपाचो निर्देश जिल्लोधिकाऱ्यान दिलां. एटीएमच्या सुरक्षे खातीर अतिरिक्त सुरक्षा रक्षक तैनात करप आनी सीसीटीव्ही तशेंच पॅनीक बटणां सयत इलॅक्ट्रॉनीक सर्व्हे सिस्टिम लावप गरजेचें अशें आदेशांत म्हणलां.