भांगरभूंय | प्रतिनिधी
डेहराडून, खबरां संस्था ः भारत आनी पाकिस्तान हांचे मदीं वाडत आशिल्ल्या तणावाच्या फाटभुंयेर चार धाम यात्रे वेळारच्यो हेलिकॉप्टर सेवा बंद केल्या. फुडल्या आदेशा मेरेन ही बंदी आसतली. ज्या प्रवाशां खातीर हेलिकॉप्टर बुकींग केल्लें तेंय रद्द करपाचें काम सुरू आसा.
यूपीसीए (उत्तराखंड नागरी विमान विकास प्राधिकरण) च्या म्हणण्या प्रमाण, चार धाम यात्रा हेलिकॉप्टर सेवा सधअया खातीर स्थगीत केल्या. हेलिकॉप्टर सेवा फकत चार धाम यात्रा थळां वयल्यान यात्रेकरुंक भायर काडपा खातीर उपलब्ध आसा.
गुप्त काशी, सिरसी आनी फाटा हांगाच्यान केदारनाथ धाम खातीर हेलिकॉप्टर सेवा दितात. पूण भारत आनी पाकिस्तान हांचे मदली तणावाची परिस्थिती मतींत घेतल्यार सध्या हेलिकॉप्टर सेवा बंद केल्या. हाका लागून चार धाम यात्रेंतल्या प्रवाशांचो आंकडो उणो जालां.
पर्यटन हंगामाचेर परिणाम….
दुसरे वटेन हाचो परिणाम उत्तराखंडांतल्या पर्यटनाचेरूय जावपाक लागला. मसूरी-धनोल्ती, लॅन्सडाउन, चक्राता, हर्षिल ह्या सारक्या जायत्या पर्यटन थळांचे लोक बुकींग रद्द करतात. मसूरींत फाटल्या 24 वरांत 30 टक्क्यां परस चड लोकांनी आपली आगाऊ बुकींग रद्द केल्या.
आयज वीकेंड आसलो तरी पर्यटन हंगामाचेर 50 टक्के परिणाम जाला. पंजाब, हरियाणा, गुजरात, मध्य प्रदेश, महाराष्ट्र, उत्तर प्रदेश ह्या सारक्या जायत्या राज्यांतल्यान मसूरीक येवपी पर्यटकांनी आपली भोंवडी रद्द केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
