भांगरभूंय | प्रतिनिधी
खबरा संस्था
नवी दिल्ली : पहलगाम आतंकवादी हल्ल्याक जाप दितना ऑपरेशन सिंदूर खाला भारतान पाकिस्तान आनी पाकव्याप्त काश्मीरांत 9 सुवातांचेर क्षेपणास्त्रान हल्लो केले उपरांत पंजाब आनी राजस्थान हायअलर्टाचेर आसा. कारण ह्या दोनूय राज्यांच्यो शिमो पाकिस्तानाक तेंकल्यात.
पाकिस्ताना वांगडा पंजाबाची 532 किलोमिटरांची जाल्यार राजस्थानाची सुमार 1,070 किलोमिटरांची शीम आसा. अधिकाऱ्यांनी सांगलें, पंजाब पुलिशेन आपल्या सगल्या कर्मऱ्यांच्यो सुटयो रद्द केल्यात, जाल्यार राज्य सरकारान शिमेर आशिल्ल्या स जिल्ह्यांतल्यो शाळा बंद केल्यात. सुत्रांनी दिल्ले म्हायती प्रमाण राजस्थान सरकारान लेगीत शिमे वयल्या वाठारांत तैनात सगळ्या प्रशासकीय अधिकाऱ्यांच्यो तशेंच पुलीस कर्मचाऱ्यांच्यो सुटयो रद्द केल्यात.
पहलगाम हल्ल्याच्या दोन सप्तका उपरांत ऑपरेशन सिंदूर खाला मंगळारा राती सैन्य हल्ले केल्ले. पहलगाम हल्ल्यांत 26 जाणांक मरण आयिल्लें, तातूंत चडशे पर्यटक आशिल्ले. पुलीस म्हासंचालकाच्या कार्यालयान जारी केल्ल्या आदेसांत म्हणलां, प्रशासकीय कारणां खातीर पंजाब पुलिसेच्या सगळ्या अधिकाऱ्यांच्यो, कर्मचाऱ्यांच्यो सुटयो 7 मे सावन रद्द केल्यात.
आदेशांत म्हणलां, वाडटो तणावाचे फाटभुंयेर पंजाबाचे शिमे वयले स जिल्हे फिरोजपूर, पठाणकोट, फाजिल्का, अमृतसर, गुरुदासपूर आनी तरन तारन हातूंतल्यो सगळ्यो शाळा फुडलो आदेश ये मेरेन बंद आसतल्यो. पंजाबाचे मंत्री अमन अरोडा हांणी दिल्ले म्हायती प्रमाण राजस्थानाचे शिमे वयल्या श्री गंगानगर, बिकानेर, जैसलमेर आनी बाडमेर ह्या जिल्ह्यांतल्यो सगळ्यो सरकारी तशेंच खाजगी शाळा बंद दवरल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
