भांगरभूंय | प्रतिनिधी
अहवालाचेर मुख्यमंत्री घेतले भौशीक बांदकाम खात्या कडेन बसका
पणजी : कला अकादमी कृती दळान सादर केल्ल्या अहवालांत दुरुस्ती उपरांत कला अकादमीच्या 18 ते 20 फांट्यांत दोश दाखयल्यात. कृती दळान बिरेस्तारा मुख्यमंत्री डॉ. प्रमोद सावंत हांकां अहवाल सादर केलो. ह्या अहवालाचेर मुख्यमंत्री भौशीक बांदकाम खात्या कडेन चर्चा करून फुडलो निर्णय घेतले. अहवाल सादर केल्ल्याची म्हायती कृती दळाचे अध्यक्ष विजय केंकरे हांणी दिली.
आपणाक कृती दळान अहवाल सादर केला. ह्या अहवालाचेर हांव भौशीक बांदकाम खात्या कडेन बसका घेवन फुडलो निर्णय घेतलों अशें मुख्यमंत्री डॉ. प्रमोद सावंत हांणी सांगलें.
सरकारान 70 कोटी परस चड पयशे खर्च करून कला अकादमीची दुरुस्ती तशेंच नुतनीकरण केलें. दुरुस्ती तशेंच नुतनीकरणाच्या कामाचेर चडशा कलाकारांनी दुबाव उक्तायला. आवाजाची तशेंच उजवाडा यंत्रणा सदोश आसा अशे आरोप कलाकारांनी केले. हाचे उपरांत तपासणी करून सरकाराक अहवाल सादर करपा खातीर मुख्यमंत्री डॉ. प्रमोद सावंत हांणी कृती दळाची स्थापणूक केली. विजय केंकरे हे कृती दळाचे अध्यक्ष आसात. कृती दळान कला अकादमीच्या कामाची पळोवणी करून बसकेंत चर्चा केली. कंत्राटदारांकूय आपोवन तांचे कडल्यान स्पश्टीकरण घेतलें. नुतनीकरणा खातीर जीं कामां केल्यांत, तीं पास जावपा इतले लेगीत गूण दिवपाच्या लायकीचीं नात अशें मत अध्यक्ष विजय केंकरे हांणी उक्तालें. कृती दळाची बिरेस्तारा बसका जाली. बसके उपरांत कृती दळान अहवाल सादर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
