भांगरभूंय | प्रतिनिधी
सांग्यार 78 कोटी रुपया खर्चून जातलें रवींद्र भवन
पणजी : सत्तरी म्हालांत वेळगें- दाबोस पूल उबारपाच्या प्रस्तावाक मान्यताय दिल्या. जीएसआयडीसीचे बसकेंत दाबोस पुला सयत सांग्यार रवींद्र भवन प्रकल्पाक लेगीत मान्यताय दिल्या. रवींद्र भवना खातीर 78 कोटी रुपया खर्च येतलो. बसकेंत 560 कोटींच्या 9 मोट्या प्रकल्पांक मान्यताय दिली.
मुख्यमंत्री डॉ. प्रमोद सावंत हांच्या फुडारपणा खाला गोंय मुळाव्या साधनसुविधा म्हामंडळाची (जीएसआयडीसी) बसका जाली. बसकेक म्हामंडळाचे उपाध्यक्ष आमदार केदार नायक, वेवस्थापकी संचालक हरीश अडकोणकार आनी हेर मानेस्त हाजीर आशिल्ले. गोंय वैजकी म्हाविद्यालया खातीर शिक्षणीक इमारत ( 281 कोटी), गोरवा चिकित्सा म्हाविद्यालय इमारत (143 कोटी), वेळगें- दाबोस पूल (16 कोटी), रवींद्र भवन, सांगें (78 कोटी), बोंदीर सांता क्रुझ हांगा खेळा संकूल (9 कोटी), मुरगांवां 20 खाटींचे भलायकी केंद्र (18 कोटी), आयओसीचे मजतीन दिवचले हॉस्पिटल (7.5 कोटी), पाळी – कोठंबी पंचायत इमारत (5.05 कोटी), बेतकी – खांडोळा मार्केट संकूल (2.50 कोटी) ह्या प्रकल्पांक बसकेंत मान्यताय दिली अशी म्हायती जीएसआयडीसीचे वेवस्थापकी संचालक हरीश अडकोणकार हांणी दिली.
बांबोळेची गोंय वैजकी म्हाविद्यालयाची शिक्षणीक इमारत मोडून ताचे सुवातेर नवी इमारत बांदपाच्या प्रस्तावाक मान्यताय मेळ्ळी. सद्याचेच सुवातेर 281 कोटी रुपया खर्च करून नवी इमारत बांदतले. पावसा उपरांत इमारत बांदकामाचें काम सुरू जातलें अशी म्हायती जीएसआयडीसी कडल्यान मेळ्ळी.
गोंय वैजकी म्हाविद्यालयाचे डीन कार्यालय आनी लेक्चर हॉला खातीर नवी इमारत बांदतले. सद्याची इमारत पोरणी जाल्या देखून अपडेट सुविधा आशिल्ल्या लेक्चर हॉला खातीर नवी इमारत गरजेची आसा. कांय दिसांनी निविदा जारी जातली. कंत्राटदाराची निवड जाले उपरांत इमारतीचें बांदकाम सुरू जातलें अशी म्हायती जीएसआयडीसीचे वेवस्थापकीय संचालक अडकोणकार हांणी दिली. ही शिक्षणीक इमारत आशिल्ल्यान ताचो हॉस्पिटला कडेन कसलोच संबंद आसचो ना.
पशू वैजकी म्हाविद्यालयाकूय सरकारान मान्यताय दिल्या. पशू वैजकी म्हाविद्यालया खातीर 143 कोटी रुपया खर्च करून नवी इमारत बांदपाच्या प्रस्तावाक मान्यताय मेळ्ळी. उजगांवां पशू वैजकी म्हाविद्यालय उबारपाचो प्रस्ताव आसलो तरी सुवात बदलप शक्य आसा. ती सुवात निमाणी थारले उपरांत निविदा जारी जातली.
9 कोटी रुपया खर्च करून सांता क्रुझ हांगा खेळां संकूल बांदपाच्या प्रस्तावाकय मान्यताय मेळ्ळी. तशेंच ह्या प्रकल्पांत कार्यालय आनी सभाघर आसतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
