भांगरभूंय | प्रतिनिधी
२५ हजारां परस चड भावीक येतले
पणजीः गोंयच्या पर्यटनाची वळख ही ‘भोग भूमी’ म्हूण जाल्या. मात ती ‘योग भुमी’ वा ‘देव भुमी’ म्हण जावन अध्यात्म पर्यटनांत एक नवो अध्याय रचपाच्या हेतान सनातन संस्था शंखनाद महोत्सव घडोवन हाडटली. गोंयचें देंवत चलिल्लें पर्यटन अध्यात्मा वरवीं परतून देशांत पयल्या नंबराचेर हाडप हो महोत्सवाचो हेत आसा, अशें सनातन संस्थेचे म्हणयारे चेतन राजहंस हांणी सांगलें.
पणजे जाल्ले पत्रकार परिशदेंत ते उलयताले. ह्या वेळार आर्ट ऑफ लिव्हिंगचे संतोष घोडगे, सांस्कृतीक न्यासाचे जयंत मिरिंगकार, आंतरराष्ट्रीय बजरंग दळाचे नितीन फळदेसाय, कुंडय तपोभूमी पद्मनाभ संप्रदायाचे सुजन नायक, ब्राह्मण महासंघाचे राज शर्मा, जगद्गुरु स्वामी नरेंद्राचार्य महाराजांचे अनुयायी अनिल नायक आनी गोमंतक मंदिर महासंघाचे जयेश थळी हजर आशिल्ले.
१७ ते १९ मे मजगतीं फर्मागुडीआभियांत्रिकी महाविद्यालयाच्या मैदानाचेर जावपी ‘सनातन राष्ट्र शंखनाद महोत्सव’ हो फक्त धर्मीक न्हय, तर आंतरराष्ट्रीय पांवड्यार आध्यात्मीक जागृतायेचो महोत्सव थारतलो. २३ देशांतले प्रतिश्ठीत मानेस्त, विवीध संप्रदायांचे संत- महंत, देवळांचे विश्वस्त आनी २५ हजारां परस चड भावीक हातूंत वांटेकार जातले, अशें राजहंस हांणी सांगलें.
महोत्सवाच्या उक्तावणा खातीर आमी गोंयच्या मुख्यमंत्री सयत महाराष्ट्राचे मुख्यमंत्री आनी उप मुख्यमंत्री, उत्तर प्रदेश, छत्तीसगड, गुजरातचे मुख्यमंत्र्यांक निमंत्रण दिलां. काशी विश्वनाथ कॉरिडॉर आनी अयोध्येच्या श्रीराम मंदिरा खातीर उत्तर प्रदेश राज्याक दरवर्सा २२ हजार कोटी रुपयांचें उत्पन्न मेळटा. देखून पर्यटन क्षेत्रांत ७ व्या क्रमांकाचेर आशिल्लें उत्तर प्रदेश आतां पयले वळेरेंत पावलां. हेवटेन पयले वळेरेंत आशिल्लें गोंय सकयल वचत आसा. हाचे वेल्यान दिसून येता की फक्त आध्यात्मीक पर्यटन राज्याचे अर्थव्यवस्थेक व्हडा प्रमाणांत प्रमाणात गती दिता, अशें राजहंस हांणी सांगलें.
देवळां म्हणल्यार देशाचे अर्थवेवस्थेचो आत्मो आनी कणो आसा. आयज संवसारीक पांवड्यावेली उद्देगीक शारांचो विध्वंस, संवसारीक पांवड्यार उद्देगीक शारांचो विध्वंस जायत आसतनाच, उज्जैन, तिरुपती, रामेश्वरम्, काशी सारकिल्लीं तिर्थक्षेत्रां आशिल्लीं शारां हजार वर्सां सावन तिगून आसात आनी तशी तांच्या वाठारांची उदरगत जाल्या, अशें राजहंस हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
