भांगरभूंय | प्रतिनिधी
पणजीः शिरगांव लयराई जात्रेंत जाल्ली खेटाखेट प्रशासनाच्या जात्रेंतल्या वेवस्थेक कळाव जाल्ल्यान जाली. सध्याचे अध्यक्ष दीनानाथ गांवकार आनी पदाधिकारी हांणी हे घडणुकेक सध्याची देवस्थान समिती जापसालदार ना अशें सांगलें.
दीनानाथ गांवकार आनी पदाधिकारी हांणी समितीच्या आदल्या अध्यक्षान आपल्या कार्यकाळांत प्रशासना कडेन पत्रवेव्हार करूंक नाशिल्लो आनी हे खेटाखेट दुर्घटनेक तेंय जापसालदार आसूं येतात असो गंभीर आरोप केलो.
बिरेस्तारा आयोजीत केल्ले पत्रकार परिशदेंत खेटाखेट प्रकरणाचेर टिप्पणी करतना तांणी हे आरोप केल्यात. मजगतीं, कांय दिसां आदीं लयराई देवस्थान समितीचे आदले अध्यक्ष गणेश गांवकार हांणी ह्या प्रकरणाक सध्याचे अध्यक्ष दीनानाथ गांवकार जापसालदार आसा असो आरोप केल्लो. ते विशीं आतां सध्याचे समितीन आनी अध्यक्षांनी पत्रकार परिशद घेवन ते आरोप खोडून काडले.
आदल्या अध्यक्षान म्हणिल्लें….
सरकारान लयराई जात्रेंक राज्य उत्सवाचो दर्जो दिवपाचो निर्णय घेतिल्लो. तशें जाल्लें जाल्यार थंयच्या भक्तांक गरजेच्यो सगळ्यो सुविधा सरकार स्वताच्या खर्चान उपलब्ध करुन दिता आसलें. पूण देवस्थान समितीन सरकाराच्या ह्या निर्णयाक विरोध केलो. अशें आसून लेगीत अंदूंच्या जात्रेंत मामेलदार आनी पुलिसांनी पुराय सहकार्य केलें. पूण सध्याचे देवस्थान समितीन तांकां मात लेगीत सहकार्य करूंक ना असो आरोप आदले अध्यक्ष गणेश गांवकारान केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
