भांगरभूंय | प्रतिनिधी
पणजी ः आतंकवाद्यांनी पहलगामांत हल्लो करून बायलांचो सिंदूर पुसून पाप केलें. ‘ऑपरेशन सिंदूर’ हो भारतान सिंदूर पुशिल्ल्याचो घेतिल्लो बदलो अशें विधान मुख्यमंत्री डॉ. प्रमोद सावंत हांणी केलें. गोंयांत तशेंच देशांतल्या हेर वाठारांनीय मॉक ड्रिल प्रयोग सामको येसस्वी जाल्ल्याचें मुख्यमंत्र्यान सांगलें.
आतंकवाद्यांनी 27 जाणांक जिवेशीं मारुन तांच्या बायलांक विधवा केले. तांचो सिंदूर पुसलो. प्रधानमंत्री नरेंद्र मोदी हांच्या फुडारपणा खाला भारतान ताका सडेतोड जाप दिली आनी 9 सुवातींनी आतंकवाद्यांचेर हल्लो केलो. ऑपरेशन सिंदूर हें देश वा खंयच्याच धर्मा आड नाशिल्लें. तें आतंकवादाच्या आड आशिल्लें. पाकिस्तानांत आतंकवादी तळ आशिल्ल्यान पाकिस्तान आतंकवाद्यांक पोसतात हें सिद्ध जालां, अशें तांणी सांगलें.
कर्नल सोफिया कुरेशी आनी विंग कमांडर व्योमिका सिंग हांणी ऑपरेशन सिंदूराचें फुडारपण केलें. बायलांचो सिंदूर पुसपाचे कृतीचो हो सूड बायलांनीच घेतलो. ऑपरेशन सिंदूराचें फुडारपण करपी एक फुडारी हो मुसलमान अधिकारी आसा. हाचे वयल्यान ही कारवाय धर्मा आड ना हें सिद्ध जाता अशें मुख्यमंत्र्यान सांगलें. पाकव्यात वाठारांतले आतंकवादी तळ नश्ट करपाची ही पयलीच खेप. हाचे आदीं कोणेंच हें करूक ना, अशें तांणी सांगलें.
ऑपरेशन सिंदूर उपरांत गोंयांत तशेंच देशांतल्या हेर वाठारांनी मॉक ड्रिल जाली. गोंयांतलो मॉक ड्रिल प्रयोग येसस्वी जालो. मांडवी पूल कोसळ्ळ्यार परिस्थिती कशी हाताळूं येता हें आमी दाखयलें. दाबोळे विमानतळार बॉम्बस्फोट जाल्यार कसो प्रतिसाद दिवचो हाचेर मार्गदर्शन केलें अशें मुख्यमंत्री डॉ. सावंत हांणी सांगलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
