भांगरभूंय | प्रतिनिधी
म्हापशें ः नास्नोळा सरपंचपदार नीलेश केरकार हांची विरोधा विणें निवड जाली. आदले सरपंच फ्रेडी फर्नांडीस हांणी सत्ताधारी गटांतल्या अलिखीत करारा प्रमाण राजीनामो दिल्ल्यान हें पद रितें आशिल्लें.
आयज सकाळीं नवो सरपंच निवडपा खातीर पंचायत मंडळाची विशेश बसका जाली. ह्या वेळार उपसरपंच रूपाली नायक, फ्रेडी फर्नांडीस, नीलेश केरकार, सतीश गोवेकार, ट्रेझा नायक आनी संजीवनी खलप हे पंच वांगडी हजर आशिल्ले. जाल्यार पंच वांगडी गोविंद गोवेकार हे हजर रावूंक नात.
सरपंचपदा खातीर नीलेश केरकार हांचो एकूच अर्ज आयलो. हाका लागून अधिकार्यांनी विरोधा विणें निवड जाल्ल्याचें जाहीर केलें. अधिकारी म्हणून गटविकास विस्तार अधिकारी मुरारी वराडकार हांणी कामकाज पळयलें. तांकां पंचायत सचीव रंजना राऊत हांणी सहकार्य केलें.
आदले आमदार ग्लेन टिकलो, भाजप मंडळ अध्यक्ष रणजीत उसगांवकार, आदले अध्यक्ष फ्रेन्की कार्व्हालो आनी हेरांनी सरपंचपदार निवड जाल्ले खातीर केरकार हांकां परबीं भेटयलीं.
नवे सरपंच केरकार हांणी विरोधा विणें निवड केल्ले खातीर पंच वांगड्यांचे उपकार मानले. सरकार आनी आदले आमदार ग्लेन टिकलो हांच्या सहकार्यान गांवांतलें वीज, रस्ते आनी उदका पुरवण सारकिल्ल्यो समस्या सोडोवपाचो यत्न करतले. तशेंच सरकारा वरवीं उदरगतीचीं खूब कामां चालीक लावपाचो आमचो हेत आसतलो, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
