भारताचो पाकिस्तानाचेर ड्रोन हल्लो
भांगरभूंय | प्रतिनिधी
लाहोर, खबरां संस्था: ऑपरेशन सिंदूर उपरांत भारतीय वायूदळान ड्रोन वापरून लाहोरांतली एअर डिफेन्स सिस्टीम आनी रडार यंत्रणां उध्वस्त केल्ल्याची म्हायती मुखार आयल्या. पाकिस्तान भारताचेर व्हड हल्लो करपाच्या यत्नांत आशिल्लें. ह्या हल्ल्याक जाप म्हणून भारतान हो हल्लो करून पाकिस्तानची एचक्यू-९ रडार यंत्रणां नश्ट केल्या.
अवंतीपुर, श्रीनगर, जम्मू, पठाणकोट, अमृतसर, कपूरथला, जालंधर, लुधियाना, आदमपूर, भटिंडा, चंदीगड, नल, फलोदी, उत्तरलाई आनी भुज ह्या १५ सुवातां वयले भारतीय लश्कराचे तळ लक्ष करपाचो पाकिस्तानान यत्न केलो. हे खातीर पाकिस्तानान ड्रोन आनी मिसायलाचो वापर केलो.
पाकिस्तानान ७ आनी ८ मे चे राती कडेन हो हल्लो करपाचो यत्न केल्लो.
मजगतीं, एचक्यू-९ ही चायना प्रेसिजन मशिनरी इम्पोर्ट-एक्सपोर्ट कॉर्पोरेशनान विकसीत केल्ली एक क्षेपणास्त्र प्रणाली. ती चीनाच्या लश्करी तंत्रज्ञानाचें एक बरें उदाहरण मानतात आनी २०२१ वर्सा पाकिस्तानान आपल्या ताफ्यांत ताचो आसपाव केल्लो.
ऑपरेशन सिंदूर विशीं ७ मे २०२५ दिसा जाल्ले पत्रकार परिशदेंत भारतान आपले कारवायेचेर फकत लक्ष्य केंद्रीत, मोजकी आनी तणाव वाडयनाशिल्ली भुमिका स्पश्ट केल्ली. भारतांतल्या लश्करी ठिकाणांचेर कसलोय हल्लो जाल्यार ताका आमी योग्य जाप दितले, हेंय भारतान परत सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
