भांगरभूंय | प्रतिनिधी
व्हॅटिकन : पोप फ्रान्सीस हांच्या मरणा उपरांत रोमन कॅथोलीक चर्चच्या २६७ व्या पापसायबाीची निवड करपा खातीर व्हॅटिकनांत सुरू जाल्ल्या ‘पापाल कॉन्क्लेव्ह’च्या पयल्या दिसा निवड करपाक संवसारभरच्या १३३ कार्डिनलांक अपेस आयलें. ७ मे २०२५ दिसा जाल्ले पयले मतदान फेरयेंत १३३ कार्डिनल्सांनी भाग घेतलो, मात खंयच्याच उमेदवाराक गरजेचें दोन तृतीयांश भोवमत म्हणल्यार ८९ मतां मेळूंक नात. परिणाम चर्चीचे परंपरे प्रमाण सिस्टिन चॅपलांतल्यान भायर काळो धुंवर सोडलो. पोपची निवड आजूनय जावंक ना हें सांगपा खातीर चिमणींतल्यान काळो धुंवर सोडटात.
मजगतीं, आयज बिरेस्तार ८ मेक सकाळीं दोन आनी दनपरां दोन अशो चार फेर्यो जातल्यो. नव्या पोपची निवड जाय मेरेन ही प्रक्रिया चालूच उरतली. नव्या पोप खातीर जावपी मतदान सामकें गुपीतपणान जाता. कॉन्क्लेव्ह पयलीं सगल्या कार्डिनल्सांनी गुपीततायेचो सोपूत घेतलो. तांचो भायल्या संवसारा कडेन आशिल्लोय संपर्क पुरायेन बंद केलो.
पोप फ्रान्सीस हांका २१ एप्रिलाक मरण आयलें. अशे परिस्थितींत १५ ते २० दिसां भितर ‘पापाल कॉन्क्लेव्ह’ घेवप गरजेचें आसता. मतदाना मजगतीं कोणाकूच ८९ मतां मेळूंक ना, जाल्यार मतपत्रिका लासून काळो धुंवर सोडटात. जर खंयच्याय उमेदवाराक भोवमत मेळ्ळ्यार धवे चिमणेंतल्यान धुंवर भायर सरता आनी नव्या पापसायबाची निवड जाल्या हें कळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
