भांगरभूंय | प्रतिनिधी
नवी दिल्ली, खबरां संस्था: काश्मीरच्या पहलगामांत आतंकवादी हल्ल्याक जाप म्हणून भारतीय सैन्यान मंगळारा रातीं पाकिस्तानांतल्या काश्मिरांत एअर स्ट्रायक केल्लो. भारतीय सैन्याच्या ’ऑपरेशन सिंदूर’त पाकिस्तानचे णव आतंकवादी तळ उध्वस्त केल्ले. भारतीय लश्करान पीओकेंत केल्लो सर्जीकल स्ट्रायक हो फकत आतंकवाद्यांचेंच लुकसाण करपी आसतलो हें स्पश्ट केल्लें. हातूंत पाकिस्तानाचे सामान्य नागरीक वा लश्करी तळांक कसलेंच लुकसाण करूंक ना, अशेंय भारतीय सैन्यान सांगिल्लें. संवसारांतल्या चडशा देशांनी भारतीय लशक्राचे हे कारवायेचें समर्थन केल्लें. हातूंत अमेरिका, इस्रायल, फ्रान्स ह्या देशांचो आसपाव आसा. मात तेन्नाच तीन मुस्लीम देश आजूनय पाकिस्तानाक भारता वांगडा झूज करपाक अप्रत्यक्षपणान फाटबळ दिता अशी म्हायती मुखार आयल्या. भारताच्या ‘ऑपरेशन सिंदूर’ उपरांत तुर्की, अजरबैजान आनी कतार ह्या तीन देशांनी पाकिस्तानाक तेंको दिवपाचे संदेश दिल्यात.
तुर्कस्तानान पाकिस्ताना विशीं सहानुभूती उक्तायतना म्हणलें, भारताचें हें पावल झुजाची नांदी. भारतान ६ मेच्या राती कडेन पाकिस्तानांत केल्ल्या हल्ल्याक लागून आमी चिंतेस्त आसात. आमी सामान्य नागरीक रावता त्या सुवातांक लक्ष्य करपाचो निशेध करतात. भारत आनी पाकिस्तान ह्या दोनूय देशांनी आवरून चर्चा करून ह्या सगळ्यांतल्या मार्ग काडचो, असो सल्लो तुर्कस्तानान दिला.
जाल्यार अजरबैजानांतल्यान भारताच्या ‘ऑपरेशन सिंदूर’ विशीं नकारात्मक टिप्पणी केल्या. तांणी म्हणलें, आमी भारत आनी पाकिस्तान हांचे मदल्या वाडपी ताणान चिंतेस्त आसात. आमी पाकिस्तानाचेर जाल्ल्या हल्ल्याचो निशेध करतात. हो एके वटेनचोच आक्रमण आशिल्ल्यान आमी पाकिस्तानांत मरण आयिल्ल्यांच्या कुटुंबा विशीं सांतवन उक्तायतात, अशें अजरबैजानान म्हणलें.
जाल्यार कतारान तुर्कस्तान आनी अजरबैजानच्या तुळेंत संतुलीत भुमिका घेतिल्ल्याचें दिसून आयलें. आमी भारत आनी पाकिस्तान हांचे मदले ताणाचे परिस्थितीचेर सेगीत लक्ष दवरून आसात. दोनूय देशांनी बरे शेजारी आशिल्ल्याचें कर्तव्य करपा वांगडाच राजनैतीक चर्चे वरवीं समस्या सोडोवची, असो कतारान मारलो.
मात, हेर देशां प्रमाण कतारान भारताच्या ‘ऑपरेशन सिंदूर’क कसल्याच तरेचें समर्थन दिवंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
