एक चुटकी सिंदूर की कीमत

भांगरभूंय | प्रतिनिधी

धर्मीक, भावनीक मुद्दो करिनासतना ह्या दुस्मान राष्ट्रांतल्या आतंकवादाचें घट्टण करपाक जाय.

स्वतंत्र देश जालो, त्या दिसा सावन पाकिस्तान आमकां सतायत आसा. तांच्या घुसखोर आनी आतंकवाद्यांची पिडापीड सोंशीत आमच्यो तीन पिळग्यो काबार जाल्यो. आपलो देश वयर सरचो, नागरिकांची सर्वांगी उदरगत जावची हे खातीर त्या- त्या देशांतल्या सरकारांनी विवीध समाजांच्या सांगातान वावुरपाक जाय. पूण फक्त नांवांतूच पाक (पवित्र) आशिल्ल्या ह्या देशान सदांच नापाक हरकती करपाचो यत्न केलो. धर्म, हिंसा, आतंकवादाक वेंग मारून देशाचो सत्यनाश केलोच, पूण देशवासियांक पसून भिकेक लायले. आयचे घटकेक पसून तातूंत कांयच बदल जावंक ना. तांचे विशीं कांय भारतीयांक सहानुभूती आसा, हाचे विशीं दुबाव ना. धर्म हो अफुचे गुळये सारको. नशा येता, बरेंय दिसता, पूण कालांतरान देशाचो सत्यनाश जाता, समाजाचेर खूब वायट वेळ येता.
पहेलगामांत सुरक्षा वेवस्था ना, ती पळोवन आतंकवाद्यांनी बिनधास्त येवन 26 पर्यटकांक मारले. धर्म विचारून. हें सगलें सरकाराक वचून सांगात, अशींय उतरां काडलीं. अजून ते मेळूंक नात. तांकां धरून लोकां सामकार फांसार चडोवपाक जाय, कायदो बी कुशीक दवरून. इतलें भिरांकूळ काम तांणी केलां. प्रधानमंत्री नरेंद्र मोदी हांणी कालच्या हल्ल्याचे सगले अधिकार लश्कराक दिल्ले. कितें करपाचें, केन्ना आनी खंय करपाचें ताचो निर्णय लश्कर घेतलें, अशेंय स्पश्ट केल्लें. ते प्रमाण तांच्या फुडारपणा खाला, तिनूय दळांनी एकठांय येवन णव जाग्यांचेर रातीं 1.05 ते 1.30 मेरेन 25 मिणटांनी काम येशस्वी केलें. मरण आयिल्ल्या पर्यटकांक कांय प्रमाणांत न्याय मेळ्ळो. ह्या हल्ल्यांत अझर मेहमूद नांवाच्या आतंकवाद्याचीं घरचीं मेल्यांत. जैश- ए- मुहंमदाचें मुख्यालय मोडलां, अशें लश्करान म्हणलां. कांय सामान्य नागरिकूय मेल्यात, अशी खबर आसा. पूण ताका उपाय ना. कारण आतंकवादी आतां रानांनी लिपून रावनात. ते भर लोकवस्तींत सांपडात. तांचेर क्षेपणास्त्र सोडलें काय हेरांक ताची बादा जातलीच. सुक्या वांगडा ओलेंय लासता, तें अशें. पाकिस्तान लश्करानूय कारवाय केली, अशें प्रधानमंत्री शाहबाज शरीफ सांगतात. पांच विमानां उडयलीं म्हणटात. एक राफायल विमान उडयलें खंय. भारतान हें न्हयकारलां. आमीय आतां हल्लो करतले, अशी धमकी शरीफान दिल्या. म्हणटकच सगल्या भारतीयांक सादूर रावचें पडटलें.
आपूण कितें केलें, तें लश्कराक देशवासियांक सांगचें पडटा. ते प्रमाण तांणी सांगलें. व्हिडियो दाखयलो, तेंय समजू येता. पूण नेमको कसो हल्लो केलो, खंयचे वटेन गेले असल्यो संवेदनशील आनी धोक्याच्यो थारूं येतात, असल्या खबरांचें दळण चॅनलां दळीत आसात. सुरक्षा हल्ले, झुज म्हणजे क्रिकेटीची मॅच न्हय. धोल- ताशे बडयत घोशणा दिवपाचो तो इव्हेंट न्हय, हाची जाणीव आमी भारतीय केन्ना दवरतले? फाटलें 15 दीस पाकिस्तान होच विशय चलता. धर्मीक, भावनीक मुद्दो करिनासतना ह्या दुस्मान राष्ट्रांतल्या आतंकवादाचें घट्टण करपाक जाय. इतले फिशालकायेन की पाकिस्तानाक पसून ते कोणें केलें, तें कळपाक जायना. इस्रायल, इराण गुपचूप स्वताच्या पत्रकारांक पसून सांगिनासतना हल्लो करतात. केले उपरांतूय दुस्मानांक फक्त दुबाव येता इतलेंच. हे देश तितले पुरतोच धोल वाजयतात आनी ओगी रावतात. नागरीक उन्मादी अवस्थेक (हिस्टरिक) पावतले, हे खातीर खाशेले यत्न करिनात. तांची ती पद्दत आमकां आपणावप शक्य ना. ते आमकां मजत पसून करपाक शकता. खंयचोच सैनीक दावपेच, मोहीम आंखतना स्वताचे बायलेक पसून एक उतर सांगिना. दुसरे वटेन आमचे मिडियान मुंबय हल्ल्याचें थेट प्रक्षेपणूच केल्लें. झुजा बाबतींत अतिउत्साह, बालीशपणा उपकारनात. ‘पूर्व पाकिस्तानांत एक पासय मारून यो’ अशें प्रधानमंत्री इंदिरा गांधीन लश्कर मुखेली सॅम माणेकशाॅक सांगिल्लें. ताचेर सध्या दीस बरे ना. मागीर वतां. पूण थंय म्हाका जाय तशें करतलों, अशें तांणी गांधीक सांगिल्लें खंय. तिणें परवानगी दिली आनी उपरांत बांगलादेश निर्माण जालो.
आतां भारत – पाकिस्तान झूज जावपाची चिन्नां दिसतात. ताचे परस हल्ले करप बरें. तेय बी गुपचूप. ‘झूज कोणाकूच जखमी करिना फक्त तातूंत मरपी मनीस सोडल्यार’, अशें चित्रकार साल्वादोर दालीन म्हणलां. खरें तें, पूण लातों के भूत बातों से नहीं मानते, ही म्हणूय मतींत दवरूंक जाय. आतंकवाद्यां विशीं सहानुभूती दाखोवपी बरेच भारतीय आसतले. तांचे कान पिळूंक जाय. देशांत बेकायदेशीर पद्दतीन रावप्यांचो सोद घेवंक जाय. नागरी सैनीक तयार करपाचेरूय भर दिल्यार बरो. देशा खातीर लाखांनी लोक जीव दिवपाक तयार आसात. सोशल मिडियाचेर तांची उमेद, उत्साह, उन्माद जाणवता. कांय जाणांक बंदूक पसून वापरूंक कळटा आसतली. एक उलो मारल्यार लाखभर तरी राष्ट्रमोगी धांवून येतले. तांकां प्रशिक्षण दिवन शिमेर तयार दवरूं येता. इस्रायलांत ही पद्दत आसा. लश्कराक मेकळीक दीत जाल्यार ते पाकिस्तानांतलो आतंकवाद बेगीन बेणटले. मुंबय हल्लो, बाॅम्बस्फोट, ओसाम बीन लादेन. सगल्यांचे पाकिस्तान कनेक्शन आसतना, आमी न्हय तांतले, अशें पाकिस्तानी मंत्री म्हणटात. भारतीय लश्करान आतंकवाद्यांचे अड्डे पयलींच काबार केले जाल्यार भारताचेर जावपी हल्ल्यांचें प्रमाण देंवतलें. चिमटीभर सिंदुराचें मोल कितें तें ह्या एका हल्ल्यान दाखयलें, पूण इतल्यारूच लश्कराक समाधान मानून उपकारचें ना. हाचे मुखार सिंदूर पळोवनूच आतंकवाद्यांक कलकल सुटपाक जाय.