भांगरभूंय | प्रतिनिधी
पणजी: अनुकूल वातावरणाक लागून मॉन्सून 13 मे मेरेन दक्षीण अंदमान दर्यो, बंगालच्या उपसागराचो अग्नेय वाठार आनी निकोबार जुंव्यार दाखल जावपाची शक्यताय आसा. भारतीय हवामान खात्यान हे विशीं अदमास उक्तायला. अनुकूल वातावरण कायम उरल्यार 13 मे उपरांत फुडल्या वीस दिसांत मॉन्सून हिंदी म्हासागर मार्गान अरबी दर्यांतल्यान मुखार वचपाची शक्यताय आसा.
सामान्यपणान मॉन्सून 1 जून मजगतीं केरळांत जाल्यार 6 जून दिसा गोंयांत दाखल जाता. पूण कांय वेळार प्रतिकूल वातावरणाक लागून मॉन्सुनाक केरळांत पावपाक कळाव जाता. जाल्यार गोंयांत येवपाक वेळ लागता. मजगतीं बुधवारा राज्यांतलें चडांत चड आनी उण्यांत उण्या तापमानांतली वाड कायम आशिल्ली. पणजेंत चडांत चड 35 अंश जाल्यार उण्यांत उणें 27 अंश सेस्लियस तापमान आशिल्लें. मुरगांवां चडांत चड तापमान 35.4 अंश जाल्यार उण्यांत उणें तापमान 27.2 अंश सेल्सियस उरलें.
फुडले स दीस राज्यांतलें चडांत चड तापमान 35 अंश जाल्यार उण्यांत उणें तापमान 27 अंश सेल्सियस मजगतीं उरपाची शक्यताय आसा. हवामान खात्याच्या आपचलीत केंद्राचे नोंदी प्रमाण बुधवारा पेडण्यां 34.3 अंश मोपा 33.6 अंश जाल्यार पोरणें गोंया 35.7 अंश सेल्सियस चडांत चड तापमान आशिल्लें. जाल्यार म्हापश्यां 25.4 अंश, मोपा 25.2 अंश जाल्यार पोरणें गोंया 29.1 अंश सेल्सियस उण्यांत उणें तापमान आशिल्लें.
आयज पावसाचो यलो अलर्ट
हवामान खात्यान गोंयांत आयज (बिरेस्तारा) वादळी वाऱ्या सयत पावसाची शक्यताय उक्तायल्या. ते प्रमाण एका दिसाचो पावसाचो यलो अलर्ट जारी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
