भांगरभूंय | प्रतिनिधी
मुबय : केंद्र सरकाराचो पयलो राष्ट्रीय पुरस्कार फावो जाल्ल्या, गाजिल्ल्या ‘श्यामची आई’ ह्या मराठी सिनेमांत श्यामची मुखेल भुमिका करपी ज्येश्ठ अभिनेते माधव वझे आयज अंतरले. पिरायेच्या ८६ व्या वर्सा तांणी निमणो स्वास घेतलो. वझे हे उत्कृश्ठ नट आशिल्लेच, वांगडा समीक्षक म्हणूनय ते फामाद आशिल्ले. वझे हे पुण्यांतल्या वाडीया महाविद्यालयांतल्यान इंग्लीशींतले प्राध्यापक म्हणून निवृत्त जाल्ले. गोंयांत कला अकादमींतूय तांणी कांय काळ शिकयलां.
1953 वर्सा आचार्य प्र. के. अत्रे हांच्या ‘श्यामची आई’ ह्या सिनेमांत श्याम ह्या भुमिके खातीर वझे लोकप्रिय जाले. तांणी बाल कलाकार म्हणून आपली कारकीर्द सुरू केल्ली. तेन्ना सावन तांणी चित्रपट मळार आपलें खाशेलपण तिगोवन दवरलें. 2009 वर्सा तांणी ‘3 इडियट्स’ फिल्मांत जाॅय लोबोच्या बापायची भुमिका केल्ली. फाटल्या कांय दिसां सावन वझे तियात्रांत व्यस्त आशिल्लें.
21 ऑक्टोबर 1939 वर्सा जल्मल्ले माधव वझे अभिनयां बरोबरच लेखक आनी दिग्दर्शक आशिल्ले. ‘बापजन्म’, ‘3 इडियट्स’, ‘डियर जिंदगी’, ‘एवढंस आभाळ’ ह्या हिंदी आनी मराठी फिल्मांनी तांणी काम केलें. हॅम्लेट ह्या नाटकाचेंय दिग्दर्शन तांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
