भांगरभूंय | प्रतिनिधी
आमदार डॉ देविया राणे हांणी केलें नयेंकार कुटुंबाचें सांतवन
वाळपय: शिरगांव लयराईचे जात्रे दिसा खेटाखेटींत पडोशें- सत्तरीच्या सूर्या नयेंकार हाका मरण आयलें. हाका लागून कुटुंबा मुखार जायते तरेच्यो आडखळी निर्माण जाल्यात. कुटुंबाचेर आयिल्ले परिस्थितीक लागून येवपी काळांत तांच्या फाटल्यान खंबीरपणान उबें रावपाचें आस्वासन थळावी आमदार डॉ. देविया राणे हांणी दिलें. आमदार राणे हांणी हालींच मरण आयिल्ल्या सुरेश नयेंकार हांच्या कुटुंबाक मेळून तांकां पुराय फाटबळ उक्तायलें.
शिरगांवां जात्रे दिसा खेटाखेट जाली. हातूंत धोंड आशिल्ले सुरेश नयेंकार हाका मरण आयलें. कुटुंबांत सुरेश हो एकलोच जोडपी आशिल्लो. ताच्या मरणाक लागून कुटुंबाचेर पोटा पाणयाची समस्या निर्माण जाल्या. सुरेश हांचें मरण दुर्दैवी आसा. ह्या कुटुंबाचेर परिस्थितीची योग्य दखल आमी घेतल्या. ह्या कुटुंबाक शक्य तितली मजत करतलें. येवपी काळांत विवीध दृश्टीकोनांतल्यान ह्या कुटुंबा फाटल्यान खंबीरपणान उबें रावतलें, अशें डाॅ. राणे हांणी सांगलें.
पर्ये मतदारसंघांतल्या जायत्या स्तराचेर दुबळ्या घटकांक मजत करपा खातीर आतां मेरेन जायत्या पांवड्यार यत्न केल्यात. निर्माण जाल्ली परिस्थिती पयस करपा खातीर विशेश यत्न करतात. अशेच परिस्थितींत नयेंकार कुटुंबाक मदत करतले, अशें राणे हांणी स्पश्ट केलें.
मजगतीं, मुख्यमंत्री प्रमोद सावंत हांणी चार दिसां पयलीं सुरेश नयेंकार कुटुंबाची भेट घेवन तांचें सांत्वन केल्लें. तांच्या पुराय स्थितीची जाणीव तांणी करून घेतिल्ली. ह्या कुटुंबाक मदत करपाचें आस्वासन प्रमोद सावंत हांणी दिलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
