भांगरभूंय | प्रतिनिधी
पणजी ः पेडणें पुलीस स्टेशनाच्या हद्दींत आतां उगवें, मोपा, तांबोसे आनी तुयां ह्या गांवांचो आस्पाव जातलो. गृह खात्यान हें विशीं दोन वेगवेगळ्यो अधिसुचोवण्यो जारी केल्यो.
उगवें, मोपा आनी तांबोसे ह्या तीन गांवांचो आस्पाव मोपा विमानतळ पुलीस स्टेशनाचे हद्दींत केल्लो. तशीं अधिसुचोवणी 22 जून 2022 दिसा जारी केल्ली. मोपा विमानतळ पुलीस स्टेशनाची हद्द निश्चित करपी हे अधिसुचोवणेंत आतां दुरुस्ती केल्या. उगवें, मोपा आनी तांबोसे हे तीनूय गांव मोपा विमानतळ पुलीस स्टेशनाचे हद्दींतल्यान वगळ्यात. हे तीनूय गांव आतां पेडणें पुलीस स्टेशनाचे हद्दींत येतलें अशें नवें अधिसुचोवणेंत म्हणलां.
तशेंच मांद्र्यां पुलीस स्टेशनाचे हद्दी संबंदी 15 डिसेंबर 2023 दिसा अधिसुचोवणी जारी केल्ली. आतां हे अधिसुचोवणेंत दुरुस्ती करून तुयां गांव मांद्र्यां पुलीस स्टेशनाचे हद्दींतल्यान काडून पेडणें पुलीस स्टेशनांत आस्पावित केलां. ह्या दोनूय अधिसुचोवण्यांक लागून आतां पेडणें पुलीस स्टेशनांत उगवें, मोपा, तांबोसे आनी तुयां हे चारुय गांव जोडल्यात.
हे नवे अधिसुचोवणे उपरांत आतां मोपा विमानतळ पुलीस स्टेशनाचे हद्दींत वारखंड, नागझर, तोर्से, पत्रादेवी, वझरी, कासरवर्णे आनी हसापूर हे सात गांव आसतले.
तशेंच मांद्र्यां पुलीस स्टेशनाचे हद्दींत पयलीं इकरा गांव आशिल्ले. आतां तुयां गांव वगळिल्ल्यान केरी, तेरेखोल, पालये, किरणपाणी, हरमल, मांद्र्यां, मोरजे, आगरवाडो, चोपडे आनी पार्से हीं धा गांवां उरल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
