देवस्थान समिती आनी प्रशासनाच्या उल्याक भाविकांनी दिलें सहकार्य

भांगरभूंय | प्रतिनिधी

शिरगांवां आयज भाविकांची गर्दी उणी: आयज उत्सवाची सांगाता

दिवचल: लाखांनी भाविकांचें श्रद्धास्थान आशिल्लें शिरगांवचे श्री लयराई जत्रेंत शेनवारा जी घडणूक घडली आनी ह्या उत्सवाचेर बरोच परिणाम जाणवलो. हे फाटभूंयेर प्रशासनान आनी देवळाचे समितीन निमाण्या दिसा मंगळारा भाविकांनी शिरगांवां येवचें न्हय असो उलो मारलो. हाका भाविकांनी सहकार्य केल्ल्यान मंगळारा निमाण्या दिसा कौलांक गर्दी नासली.
मजगतीं मंगळारा रातीं देवी देवळांत गेले उपरांत हो उत्सव सोंपतलो. आयतारा देवस्थान समिती आनी प्रशासनान म्हत्वाची बसका घेवन उत्सवाच्या निमाण्या दिसा म्हणल्यार मंगळारा भाविकांनी शिरगांवां येवचें न्हय. देव देवळांत वतना दरवर्सा प्रमाण अंदूं गर्दी जावची न्हय आनी कसलेच तरेचो वायट प्रकार घडचो न्हय हें लक्षांत घेवन हो निर्णय घेतिल्लो. ह्या निर्णयाक भाविकांनीय सहकार्य केलें.

गांवचे कांय ग्रामस्थ आनी कांय सोयरीं सोडल्यार शिरगांवां मंगळारा भाविकांची गर्दी बरीच उणी दिसून आयली. प्रशासनान विवीध सुवातांचेर बॅरिकेट्स घालून तशेंच पुलीस बंदोबस्त दवरून भितर वाहनां सोडूंक नासलीं. चडशीं दुकानां काडिल्लीं.
देवस्थान समितीचे अध्यक्ष दीनानाथ गांवकार हांणी भाविकांनी सहकार्य केल्ले खातीर तांचे उपकार मानले. प्रशासनान हांगा शेनवारा उपरांत बरी वेवस्था दवरली. हाका लागून कसलेच तरेचो बोवाळ जावंक ना.
शेनवार स जाणांक मरण आयलें. तर जखमीं मदले कांय आजूनय उपचार घेतात. मरण आयिल्ल्यांक धा लाख जाल्यार जखमींक एक लाखांची घोशणा मुख्यमंत्र्यांनी केल्या. बारा दिसां उपरांत ती वाट्टले. ही घडणूक कशी घडली हाचो पुराय अहवाल मेळोवपा खातीर मुख्यमंत्र्यांनी एक कमिटी स्थापन केल्या. तिणें विवीध माध्यमां वरवीं तपास सुरू केला. कांय दिसांनी नेमकी घडणूक कशी घडली हाचीं कारणांय स्पश्ट जातलीं.

जात्रेक लाखांनी भावीक वाटेकार जातात आनी उमेदीच्या वातावरणांत हो उत्सव मनयतात. अंदूं शेनवारा जाल्ले घडणुकेक लागून ह्या उत्सवाचेरूय परिणाम जाणवलो. हाका लगान भाविकांचो उत्सवूय उणो जाल्ल्याचें दिसून आयलें. देवळाचे कमिटीन जी घडणूक घडली ती दुर्दैवी आशिल्ल्यान, फुडल्या वर्सा आमी सगळे तरेची काळजी घेवपा खातीर सरकाराच्या सहकार्यान जायते उपाय करतले असो उलो देवस्थान समितीन मारलो.