भांगरभूंय | प्रतिनिधी
फोंडेंः निरंकाल – दाबाळ न्हंयेर कपडे उमळपाक गेल्ले बायलेचेर दोन मानग्यांनी हल्लो केलो. हल्ल्यांत विश्रांती गांवकार (60) गंभीर जखमी जाली. मानग्यांनी बायलेचे दोनूय पांय चाबले आनी तिका उदकांत ओडून घेवपाचो यत्न केलो. पूण थळाव्या लोकांनी सादूर रावून बायलेक मानग्यांच्या चपक्यांतल्यान सोडयली आनी तिका उपचारा खातीर हॉस्पिटलांत व्हेली. तिचेर मडगांवां उपचार चलतात.
मेळिल्ले म्हायती प्रमाण, मंगळारा सकाळीं 7 वरांचे सुमाराक विश्रांती दुदसागर न्हंयचे देगेर कपडे उमळपाक गेल्ली. तेन्ना तिचेर दोन मानग्यांनी हल्लो केलो. उपरांत विश्रांतीन मजती खातीर आड्ड्यो मारल्यो. त्यो आयकून थळावे लोक थंय धावून येवन तिका उदकांतल्यान भायर काडली. मानग्यांनी तिच्या दोनूय पांयांक घांस मारिल्लो आनी तीं तिका ओडटालीं.
मजगतीं, कांय म्हयन्यां आदीं दिवचले तालुक्यांतल्या आमठाणें धरण वाठारांत धरणा लागसार हात धुवपाक गेल्ले बायलेचेर मानग्यांनी हल्लो केल्लो. हातूंत ते बायलेक मरण आयिल्लें.
वाठारांत 10-15 मानगी
हे घडणुकीक लागून वाठारांत भंयाचे वातावरण पातळ्ळां आनी फाटल्या दोन म्हयन्यां सावन ह्या एकाच वाठारांत 10-15 मानगी भोंवतात अशें थळाव्या लोकांनी सांगलें. रान खात्यान हे घडणुकेची बेगोबेग दखल घेवन मानग्यांचो बंदोबस्त करचो अशी मागणी थळाव्यांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
