भांगरभूंय | प्रतिनिधी
फोंडेंः कोडार- फोंड्यां दोगां मानायांच्या केस्तावांत एकल्याचो खून जाल्ल्याची घडणूक मंगळारा सकाळीं उक्ताडार आयली. ह्या प्रकरणांत सोर्याचे धुंदींत आशिल्ल्या मेवण्यान आपल्याच भावोजीचो खून केल्ल्याची म्हायती मेळ्ळ्या. सध्या पुलीस हे घडणुकेचो तपास करतात.
हांवें कोंबडी हाडून चिकन आनी हेर जेवण तयार केलें. आतां तुं जेवण वाड अशें म्हणीत मेवणो आनी भावोजी मदीं वाद जालो. आनी वादाचे रुपांतर मारपेटांत जालें. रागान मेवणो डेव्हिड टोपी (36) हाणें भावोजी दीपक तिरकीचेर कुराडीन हल्लो करून ताका जिवेशीं मारलो. हे दोगूय झारखंडांतले.
मेळिल्ले म्हायती प्रमाण, कोडारचे एके बागायतींत दीपक तिरसी (भावोजी) आनी डेव्हिड टोपो (मेवणो) हे दोगूय फाटल्या स म्हयन्यां सावन काम करताले. दोगूय थंयच रावताले. ताचें कुटुंब झारखंडांत आसा. सोमारा दीस भर ते सोरो पियेलें. सांजवेळार येतना फकांडां म्हूण भावोजीन मेवण्याक रस्त्या कुशीक धुकल्लो. ताचो राग डेव्हिड आयलो. तो झगडपाक निमित्त सोदतालो. घरा परतल्या उपरांत दोगांय मदीं जेवण वाडटलो हाचेर वाद जालो. वाद वाडले उपरांत डेव्हिडान रागान आंगणांत आशिल्ल्या कुराडीन दीपकाच्या मानेर वार केलो. चड रगत गेल्ल्यान दीपकाक थंयच मरण आयलें.
दोगांयनी वादाचो आवाज आयकून कोणे तरी पुलिसांक म्हायती दिली. पुलिसांची रोबॉट व्हॅन थंय पावली तेन्ना तांकां ही घडणूक दिसली. पुलीस येवचे पयलीं दीपकान थंयच्यान पळ काडिल्लो. रोखडोच पुलिसांनी ताचो सोद घेवपाक सुरवात केली. दीपक चलत खांडेपार पावलो तेन्ना तो पुलिसांचे नदरेक आयलो. तांणी ताका ताब्यांत घेवन फोंडें पुलीस स्टेशनांत हाडलो आनी खूनाच्या आरोपांत ताका अटक केली.
फकांडां जिवाचेर बेतलीं म्हणटात तीं अशीं. अर्थांत हाका सोऱ्याचें व्यसनूय तितलेंच जापसालदार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
