भांगरभूंय | प्रतिनिधी
सनरायझर्स हैदराबादाचें इंडियन प्रिमियर लिगेचे प्ले ऑफांत सुवात मेळोवपाचें आव्हान सोंपलें. दिल्ली कॅपिटल्सा आडची ताची मॅच पावसाक लागून रद्द करची पडली. हे मॅचींतल्यान दोनूय पंगडांक एकेक गूण फावो जालो.
दिल्लीन पयलीं बॅटींग करतना निर्धारीत 20 ओव्हरींनी 7 विकेटी व्हगडावन फकत 133 धांवड्यो केल्ल्यो. पूण, पावसान आडखळ हाडिल्ल्यान हैदराबादाक बॅटींग करपाची संदूच मेळूंक ना.
ते आदीं सनरायझर्स हैदराबादान जबरदस्त बॉलींग करून दिल्ली कॅपिटल्साक 7 बाद 133 धांवड्यांचेर आडायलो. सनरायझर्स हैदराबादाचो मुखेली पेट कमिन्सान टॉस जिखून पयलीं दिल्ली कॅपिटल्साक बॅटींग करपाचें आमंत्रण दिलें.
सनरायझर्साच्या बॉलरां मुखार दिल्लीच्या बॅट्समनांचें कांयच शाणपण चलूंक ना. दिल्लीन 62 धांवड्यांचेर 6 विकेटी व्हगडायल्यो. कमिन्सान चार ओव्हरींनी फकत 19 धांवड्यो दिवन 3 विकेटी घेतल्यो. करुण नायराक (0) ताणें डावाच्या पयल्याच बॉलाचेर बाद केलो. इशान किशनान ताची कॅच धरली. ते उपरांत ताणें दुसरो ओपरन फाफ ड्युप्लेसिसाक (3) तंबूंत धाडलो. ताचीय कॅच इशान किशनान धरली. ते उपरांत 15 धांवड्यांचेर अभिषेक पोरलाक (8) बाद करून कमिन्सान दिल्लीक बॅकफुटाचेर धुकल्लो.
मुखेली अक्षर पटेल आनी लोकेश राहुल डाव सांबाळटले अशें पंगड वेवस्थापनाक दिशिल्लें. पूण, तांकां लेगीत व्हड खेळी करपाक जमली ना. जयदेव उनाडकटान राहुलाक (10) बाद केलो जाल्यार हर्षल पटेलान अक्षर पटेलाक (6) बाद केलो.
दिल्लीचो पंगड शंबरा भितर बाद जातलो अशें दिसपाक लागिल्लें. पूण, अशा वेळार ट्रिस्टन स्टब्स आनी आनी विपराज निगम हांणी डाव सांबाळ्ळो. दोगांयनी सांबाळून बॅटींग केली. तांणी सवे विकेटी खातीर 63 धांवड्यांची भागिदारी केली. अखेरेक 13वे ओव्हरींत ही भागिदारी फुटली. निगम (18) धांवबाद जालो. ते उपरांत आशुतोष शर्मान स्टब्सा वांगडा मेळून सातवे विकेटी खातीर 66 धांवड्यांची भागिदारी करून दिल्लीक संकश्टांतल्यान भायर काडलो. आशुतोष शर्मान 26 बॉलांनी तीन सके आनी दोन चवक्यांचे मजतीन 41 धांवड्यो केल्यो. स्टब्सान 36 बॉलांनी नाबाद 41 धांवड्यो केल्यो.
कमिन्सा खेरीत इशान मलिंगा, हर्षल पटेल आनी जयदेव उनाडकट हांणी एकेक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
