भांगरभूंय | प्रतिनिधी
जिल्लो रस्तो सुरक्षा समितीची सुचोवणी
पणजीः दिसाचे फकत पुलीस निरिक्षकांक तालांव मारपाचे हक्क दिल्ल्यान येरादारी नेम मोडिल्ल्यांचेर पुलिसांची कारवाय खूब उणी जाल्या. हाका लागून अपघाताचें प्रमाण वाडपाची शक्यताय आसा. देखून दिसाच्या वेळार उप पुलीस निरिक्षक वा येरादारी पुलिसांक तालांव मारपाक मेकळीक दिवपा विशींची चर्चा उत्तर गोंय जिल्लो रस्तो सुरक्षा समितीचे बसके वेळार जाली.
अतिरीक्त जिल्लोधिकारी महादेव आरोंदेंकार हांच्या फुडारपणाखाला पणजे जिल्लोधिकारी केचेरेंत उत्तर गोंय जिल्लो रस्तो सुरक्षा समिती बसका जाली. ह्या वेळार पुलीस खात्याचे, येरादारी खात्याचे तशेंच हेर संबंदीत खात्याच्या अधिकार्यां सयत आप वावुरपी संस्था गोवा कॅनचे वांगडी हे बसकेंत हजर आशिल्ले.
सरकारान येरादारी नेम मोडप्यांचेर तालांव मारपाचे अधिकार दिसाचे पुलीस निरिक्षक आनी रातच्या वेळार पुलीस निरिक्षक आनी उप निरीक्षकांक आसात. जर ह्या पदा सकयले कोण अधिकारी तालांव दिता आसत जाल्यार तांचेर कारवाय जातली अशी शिटकावणी मुख्यमंत्री डॉ. प्रमोद सावंत हांणी दिल्ली. मात मुख्यमंत्र्यान ही घोशणा केले उपरांत पावला पावलार पुलीस तालांव दिवपाच्या प्रकारांत सामकोच उणाव दिसून आयलो.
हे विशीं चर्चा समितीचे बसकेंत जाली. चलान मारपाचे अधिकार फकत पुलीस निरिक्षकां मेरेन मर्यादीत दवरले उपरांत खुबशे येरादारी नेम मोडिल्ल्याचें जिल्लो रस्तो सुरक्षा समितीक दिसून आयलें. देखून दिसाचे येरादारी नेम मोडप्याक तालांव दिवपाचे प्रक्रीयेंत बदल हाडून हें चलान दिवपाचे अधिकार येरादारी पुलीस आनी पुलीस उप-निरिक्षकांक दिवचे अशी सुचोवणी समिती सरकाराक करतली.
हेर महत्वाचे मुद्दे लेगीत हे बसकेंत चर्चेक आयले. तातूंत भारत मानक ब्युरो, गिरायक वेव्हार खातें, वजन आनी माप खातें, येरादारी खातें, वेवसायीक कर खातें आनी गोवा कॅन मेळून गोंयांत विकपी डुप्लिकेट हेल्मेटां आड कृती आराखडो तयार करतलें. तशेंच गोंयांत येवपी पर्यटकांमदीं येरादारी विशीं जागृताय करपा खातीर करमळे, थिये आनी पेडणें रेल्वे स्टेशन तशेंच मोपा विमानतळाचेर रस्तो सुरक्षा तखटे लावपा खातीर कोंकणी रेल्वे महामंडळ आनी मोपा अंतरराष्ट्रीय विमानतळ अधिकार्यां वांगडा बसका घेवपाचें थारयलां.
तशेंच २०२५-२६ वर्सा खातीर सोरो परवाने अर्जाचें नुतिनकरण करतना सगळीं बार्रां आनी सोरो विकपी दुकानांक सोरो पियेवन वाहना चलोवनाकांत हो तखटो आपल्या आस्थापनां भितर लावपाक सांगलां, अशें अबकारी खात्यान हे बसके वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
