भांगरभूंय | प्रतिनिधी
पहलगाम, खबरां संस्था: जम्मू आनी काश्मीरांतल्या पूंछ वाठारांत सोमारा सुरक्षा दळाक आतंकवाद्यांचो एक अड्डो मेळ्ळो. हांगा ५ आयईडी, वायरलेस सेट आनी कांय कपडेय जप्त केल्यात. ही लिपपाची सुवात सुरणकोटच्या मरहोत गांवांत मेळ्ळी.
हे घडणुके उपरांत, श्रीनगर मध्यवर्ती बंदखण आनी जम्मूच्या कोट बलवाल बंदखणींतली सुरक्षा वाडयल्या. थंय जायते आतंकवादी बंदखणींत आसात, जे हल्ल्यांत मजत करतात. गुपीत यंत्रणेच्या अलर्ट उपरांत हें पावल उबारलें.
जम्मू आनी काश्मीर प्रशासनान चिनाब न्हंयेवेल्या बगलिहार आनी सलाल धरणांचीं दारां बंद केल्यांत. हातुंतल्यान उदक पाकिस्तानांत वतालें. पहलगाम हल्ल्या उपरांत भारतान सिंधू उदकाचो करार रद्द केलो, जाका लागून पाकिस्तान सरकार तिडकलां.
एनआयएन जम्मूतल्या कोट बिलावल बंदखणींत लश्कराचे ओव्हर ग्रावंड वर्कर्स निसार अहमद आनी मुश्ताक हुसेन हांची चवकशी केली. २०२३ वर्सा डांगरी जाल्ल्या आतंकवादी हल्ल्यांत दोगांनीय आतंकवाद्यांक मदत केल्ली. पहलगाम हल्ल्यांतूय तांणी आतंकवाद्यांक मजत केल्ल्याचो दुबाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
